Կիմ Կի Դուկ

20 տարեկանում Կիմը ծովային նավատորմում անցնում է զինվորական ծառայության: Ծառայությունից հետո նա որոշում է հոգևորական դառնալ և նույնիսկ հաճախում է եկեղեցի: Այդ ընթացքում նա միաժամանակ տարվում է նկարչությամբ:

Աստիճանաբար նկարչությունը երիտասարդ տղային սկսում է ավելի ու ավելի հետաքրքրել, և 1990թ. նա գնում է Փարիզ ուսանելու նպատակով: Փարիզը ոգեշնչում է Կիմին ոչ միայն նկարչության, այլև գրականության բնագավառում:

1993թ. նա գրում է իր առաջին սցենարը «Նկարիչը և հանցագործը» ֆիլմի համար, որն արժանանում է «Սցենարիստների համալսարան»-ի պարգևին: Այստեղից էլ սկսվում են Կիմ Կի Դուկի մեկը մյուսին հաջորդող պարգևներն ու մրցանակները:

Մի քանի ֆիլմերի համար սցենարներ գրելուց հետո նա անցնում է արդեն ռեժիսորական գործունեության, որն սկսում է 1996թ. «Կոկորդիլոսը» ֆիլմով: Նրա ֆիլմերից են «Դատարկ տունը», «Գարուն, ամառ, աշուն, ձմեռ», «Վայրի կենդանիներ», «Իրական հերյուրանք» և այլն:

Հարկ է նշել, որ ռեժիսորի ֆիլմերում գրեթե բոլոր գլխավոր հերոսները լուռ են. նրանց համար խոսքն ավելորդ է: Ռեժիսորի հայտնի «Սամարացին» ֆիլմը ցայսօր էլ ժամանակակից կինոմատոգրաֆիայի գլուխգործոցներից է շարունակում մնալ: