Ստացի՛ր այնպիսի սնուցում, որի կարիքն ունես

Տարիքի հետ ճիշտ սնուցումն սկսում է ավելի մեծ դեր խաղալ: Սննդակարգում քիչ քանակով աղ, ճարպ օգտագործելը, համակցելով շատ միրգ-բանջարեղենի և թելիկավոր սննդի հետ, ըստ էության, նվազեցնում է սրտային հիվանդությունների, շաքարախտի, կաթվածի, օստեոպորոզի և այլ քրոնիկական հիվանդությունների` տարիքին ներհատուկ ռիսկերը:

Բազմազան սնունդ օգտագործելը կնպաստի, որպեսզի հեշտությամբ ստանաք այն, ինչի կարիքն ունի օրգանիզմը, այդ թվում`

սպիտակուց, որը պետք է մկանները պահպանելու և վերականգնելու համար,
ածխաջրեր, որոնք էներգիայի նախընտրելի աղբյուր են օրգանիզմի համար,
ճարպ, որը նույնպես ապահովում է էներգիա,
ջուր, որն անհրաժեշտ է օրգանիզմի կորցրած ջրի քանակը վերականգնելու համար:

Ձեր օրվա սննդակարգն ուսումնասիրելիս հիշեք, որ մեծանալուն զուգահեռ`

ձեր օրգանիզմի էներգիայի պահանջն աստիճանաբար նվազում է, այսինքն` օրվա ընթացքում պահանջվում է ավելի քիչ կալորիա, քան երիտասարդ տարիքում,
տարիքի հետ հորմոնների քանակի փոփոխությունները նպաստում են օրգանիզմում ճարպի սինթեզի ավելացմանը,
ոսկորներն ավելի արագ են դեմիներալացվում, քան նախկինում, ուստի կանխարգելիչ նպատակներով պետք է ստանալ ավելի շատ կալցիում և վիտամին D: