Առաջին օգնություն երեխաներին. ջրազրկում

Ջուրն անչափ կարևոր է բոլոր կենդանի օրգանիզմների համար: Երբ օրգանիզմը մեծ քանակով հեղուկ է կորցնում, առաջանում է վտանգավոր վիճակ` ջրազրկում: Մինչև մեկ տարեկան երեխայի մարմնի քաշի մոտ 80%-ը կազմում է ջուրը, ուստի երեխաների համար, հատկապես՝ մինչև 1 տարեկան երեխաների, ջրազրկումը կարող է կյանքին սպառնացող վտանգ դառնալ: Շատ կարևոր է ժամանակին ճանաչել այն վիճակները, որոնք կարող են հանգեցնել ջրազրկման, և շտապ օգնություն ցուցաբերել:

Պատճառները

Ջրազրկման պատճառներն են`

- լուծը,

- կրկնվող փսխումները, առատ քրտնարտադրությունը,

- մեծ մակերեսով կամ խորը այրվածքը,

- բարձր ջերմությունը:

Երբ մի քանի պատճառ համադրվում է, ջրազրկումը ավելի արագ է զարգանում, օրինակ, եթե երեխան ունի բարձր ջերմություն և լուծ, ապա դա ավելի արագ կհանգեցնի ջրազրկման, քան միայն լուծը կամ միայն բարձր ջերմություն ունենալը:

Ուշադրություն.

Փոքրահասակ երեխաների մոտ ջրազրկում կարող է առաջանալ նույնիսկ 1-2 անգամ ջրիկ փսխումի հետևանքով:

Նշանները

Ջրազրկման սկզբնական շրջանում ի հայտ են գալիս հետևյալ նշանները՝

- գրգռված, անհանգիստ վիճակ,

- աչքերը ներս ընկած են,

- ծարավի զգացումը արտահայտված է, երեխան ագահությամբ է ջուր խմում,

- բերանը և մաշկը չոր են:

Ծանր ջրազրկման մասին խոսում են հետևյալ նշանները՝

- քնկոտություն, ընդհանուր թուլություն,

- ծարավի բացակայություն, երեխան դժկամությամբ է ջուր խմում,

- բերանը և մաշկը շատ չոր են,

- աչքերը շատ ներս ընկած են, դիմագծերը` սրված,

- լացելիս արցունքներ չկան,

- մեզի քանակը և միզելու հաճախականությունը պակասում են:

Ջրազրկման կանխարգելումը

- Երեխաներին բավարար քանակությամբ հեղուկ տվեք, հատկապես՝ շոգ եղանակին: Շոգ եղանակին ջուր տվեք նաև կրծքով սնվող երեխաներին,

- Երեխաներին տվեք եռացրած և հովացրած ջուր,

- Տանն ունեցեք ջրազրկման ժամանակ օգտագործվող աղային լուծույթների պատրաստուկներ (օրինակ` ռեհիդրոն),

- Եթե երեխան լուծ է, բարձր ջերմություն ունի կամ փսխումները կրկնվում են, ապա առանց սպասելու ջրազրկման նշանների արտահայտվելուն, նրան հեղուկներ տվեք և շտապ դիմեք բժշկի:

Ուշադրություն.

Լուծի դեպքում մի´ շտապեք դիմել լուծը դադարեցնող դեղորայքների կամ տնային միջոցների: Լուծը կարող է լինել աղիքային վարակի նշան, և այդ միջոցները միայն կվատթարացնեն երեխայի վիճակը:

Ինչ անել

1. Ահազանգեք շտապ օգնություն կամ դիմեք բժշկի.

Եթե երեխան լուծ է, փսխումները կրկնվում են, առատ քրտնարտադրություն ունի կամ բարձր ջերմություն, միաժամանակ ի հայտ են գալիս ջրազրկման նշաններ, ապա շտապ դիմեք բժշկի: Եթե երեխայի վիճակը վատացել է գիշերը, բժշկի դիմելու խնդիրը մի հետաձգեք մինչև լուսանալը, անհապաղ ահազանգեք շտապ օգնություն:

Երեխայի ջրազրկման դեպքում հաճախ ներերակային ներարկումներ կատարելու անհրաժեշտություն է լինում, ինչը հնարավոր չէ անել տանը: Եթե բժիշկը խորհուրդ է տալիս երեխային հիվանդանոց տեղափոխել, մի հրաժարվեք: Ձեր սխալ որոշումը կարող է ճակատագրական լինել երեխայի համար:

2. Սկսեք հեղուկներ տալ:

Որքա՞ն հեղուկ տալ և ինչպե՞ս

Եթե երեխան 2 տարեկանից մեծ է, նրան անհրաժեշտ է հաճախակի հեղուկ տալ, սակայն փոքր կումերով: Օրական երեխային տրվող հեղուկի քանակությունը պետք է կազմի 800-1000 մլ (4-5 բաժակ): Եթե երեխան 2 տարեկանից փոքր է, անհրաժեշտ է նրան հեղուկը տալ թեյի գդալով յուրաքանչյուր 2 րոպեն մեկ: Այս դեպքում օրական տրվող հեղուկի ծավալը պետք է կազմի 200-500 մլ (1-2 բաժակ):

Հիշեք, որ եթե նույնիսկ երեխան սնվում է կրծքով, ջրազրկման դեպքում նրան, միևնույն է, անհրաժեշտ է լրացուցիչ հեղուկ տալ: Որպեսզի երեխան համաձայնի ռեհիդրոնի լուծույթ խմել և չփսխի, փորձեք նրան հաջորդաբար տալ մի կում ռեհիդրոն և մի կում կոմպոտ: Եթե երեխան հրաժարվում է ռեհիդրոնից կամ նման հեղուկներից, այդ դեպքում նրան կոմպոտ, թեյ կամ սովորական ջուր տվեք:

Եթե երեխան փսխում է, ապա անկախ տարիքից՝ հեղուկները նրան անհրաժեշտ է տալ ամեն 2-3 րոպեն մեկ` 1-ական թեյի գդալ: Միշտ հիշեք, որ եթե երեխան փսխում է, ապա նրա վիճակը շատ ավելի վտանգավոր է: