Բնականը դեռ լավը չէ

Հաճախ ենք տեսնում «բնական» բառը սննդի փաթեթավորման վրա և ենթադրում, որ այսպիսի գրառումով սնունդը պետք է որ առողջարար լինի: Սա վերաբերում է ոչ միայն սննդին. «բնական» բառն այսօր գրվում է կոսմետիկ միջոցների, մաքրող նյութերի, հագուստի և նույնիսկ կահույքի վրա:

Իրականում ի՞նչ է «բնական»-ը և արդյո՞ք բնական նշանակում է ավելի լավ: Բնական ասելով՝ հասկանում են արտադրանք՝ պատրաստված բաղադրամասերից, որոնք բնությունից են վերցված և մարդու ստեղծած քիմիկատներ չեն պարունակում:

Սպառողը հավատում է, որ այն, ինչ վերցված է բնությունից, պետք է որ օգտակար լինի մարդու համար: Այս համոզմունքը կարելի է անվանել «բնական մոլորություն»:

Մեր մոլորակում բազմաթիվ «բնական»-ներ կան, որոնք ոչ միայն օգտակար չեն, այլ նույնիսկ վտանգավոր են. ծխախոտը բնական է, մկնդեղը` նույնպես: Կան բույսերից անջատված հավելումներ, որոնք նույնիսկ քաղցկեղածին են:

Այժմ տարածված է քեմոֆոբիկ ընկալումը, համաձայն որի` բոլոր քիմիական նյութերը վատն ու վնասակար են: Իհարկե, կան անասելի վնասակար քիմիկատներ, սակայն անցած հարյուրամյակում հենց քիմիկատներն են օգնել բարելավել մեր կյանքի որակն ու երկարաձգել տևողությունը:

Սխալ է նյութի ծագմամբ դատել նրա՝ օրգանիզմի վրա թողած ազդեցության մասին: Սա հատկապես ճշմարիտ է այն նյութերի դեպքում, որոնք օգտագործվում են բուժման կամ կանխարգելման նպատակով: