Ստորագրվել է ՄԱԿ-ի կանոնադրությունը

1945թ. հունիսի 26-ին ստորագրվել է Միավորված ազգերի կազմակերպության (ՄԱԿ)
կանոնադրությունը: ՄԱԿ-ը միջազգային կազմակերպություն է, որը հիմնադրվել է ԽՍՀՄ-ի, ԱՄՆ-ի, Մեծ Բրիտանիայի նախաձեռնությամբ:

Հիմնադրման նպատակն է եղել ժողովուրդների միջև խաղաղության ու անվտանգության ամրապնդման և պետությունների խաղաղ համագործակցության զարգացումը:

ՄԱԿ-ի գլխավոր մարմիններն են Գլխավոր վեհաժողովը, Անվտանգության, Տնտեսական և սոցիալական, Խնամակալության խորհուրդները, Միջազգային դատարանը, Քարտուղարությունը: ՄԱԿ-ի գործունեությունն ամբողջացնում են մասնագիտացված հաստատությունները և այլ հիմնարկներ:

ՄԱԿ-ի անդամ կարող են դառնալ այն պետությունները, որոնք հնարավորություն և ցանկություն ունեն կատարելու կանոնադրությամբ սահմանված պարտավորությունները:

Ըստ ՄԱԿ-ի կանոնադրության՝ բոլոր անդամներն իրավահավասար են և պարտավորվում են՝

հրաժարվել միջազգային հարաբերություններում ուժի գործադրումից կամ գործադրման սպառնալիքից,
միջազգային վեճերը լուծել բացառապես խաղաղ ճանապարհով,
չմիջամտել ՄԱԿ-ի անդամ պետությունների ներքին գործերին:

Միջազգային խաղաղությունն ու անվտանգությունն ամրապնդելու նպատակով ՄԱԿ-ը պարտավոր է՝

ձեռնարկել խաղաղությանը սպառնացող վտանգի վերացման, ագրեսիայի ակտերն ու խաղաղության դեմ ուղղված մյուս գործողությունները ճնշելու համընդհանուր միջոցներ,
զարգացնել ազգամիջյան բարեկամական հարաբերություններ,
նպաստել սոցիալ-մշակութային և հումանիտար խնդիրների իրականացման միջազգային համագործակցությանը,
հարգել մարդու իրավունքներն ու հիմնական ազատությունները՝ անկախ սեռից, լեզվից ու կրոնից (ՄԱԿ-ի կանոնադրություն, հոդված 1):

ՄԱԿ-ի մասնագիտացված հաստատություններից է ՅՈՒՆԵՍԿՕ-ն՝ կրթության, գիտության և մշակույթի միջկառավարական կազմակերպությունը: Գործում է 1946թ.-ի նոյեմբերից: ՅՈՒՆԵՍԿՕ-ի գործունեությունն ընդգրկում է հարցերի լայն շրջանակ`

վերացնել անգրագիտությունը և պայքարել խտրականության դեմ կրթության ոլորտում,
դաստիարակել երիտասարդությանը խաղաղության և միջազգային փոխըմբռնման ոգով,
օժանդակել ազգային կադրերի պատրաստմանը,
ուսումնասիրել ազգային մշակույթները,
ապահովել միջազգային համագործակցություն գիտության բնագավառում և այլն:

ՄԱԿ-ի պաշտոնական լեզուներն են անգլերենը, ֆրանսերենը, իսպաներենը, ռուսերենն ու չինարենը: ՄԱԿ-ին անդամակցում է ավելի քան 190 պետություն: 1992թ.-ի մարտի 2-ից ՄԱԿ-ի անդամ է նաև Հայաստանի Հանրապետությունը: