Գրքաշրջանառություն

Բուքքրոսինգը անընդհատ պրոցես է, գրքերի ազատ ընթացք, որ նպատակ ունի հանել սիրելի ու հետաքրքիր գրքերը գրապահարաններից և նրանց ուղարկել ճամփորդության: Բուքքրոսինգին մասնակցող գրքերն առանձնանում են իրենց տարբերանշաններով, իսկ գրքերի ներսում կան ինֆորմացիոն պիտակներ, որ պատմում են, թե ինչպես միանալ բուքքրոսերներին, ինչպես գրանցել սեփական գրքերը և «ազատել» դրանք: Յուրաքանչյուր մարդ կարող է դառնալ բուքքրոսեր: Ընդամենը պահանջվում է գրքին փակցնել անհրաժեշտ պիտակները (պիտակները կարելի է գտնել կայքում և տպել դրանք կամ ցանկության դեպքում կարելի է ուղղակի ձեռքով նկարել և գրել), թողնել գիրքը որևէ հասարակական վայրում (զբոսայգի, մետրոյի կայարան, սրճարաններ և այլն), որպեսզի մեկ այլ անծանոթ մարդ հնարավորություն ունենա գտնել և կարդալ այդ գիրքը: Գրքերի փոխանցման ու փոխանակման ուղիները կարող են շատ տարբեր լինել. ամենակարևորն այն է, որ յուրաքանչյուր հաջորդ բուքքրոսեր գիրքը կարդալուց հետո էլի փոխանցի: Գրքերի «ճամփորդությանը» կարելի է հետևել հատուկ կայքերի միջոցով: