Զինծառայողի հերթապահության ժամանակ վնասված կամ գողացված պետական գույքի վնասի հատուցման կարգը

Զինծառայողները նյութական պատասխանատվություն են կրում միայն իրենց մեղքով պատճառված վնասի համար: Զինծառայողներն ազատվում են նյութական պատասխանատվությունից, եթե վնասը պատճառվել է հրամանատարների (պետերի) հրամանը կատարելու, օրինաչափ գործողության, անհրաժեշտ պաշտպանության, ծայրահեղ անհրաժեշտության, արդարացված ծառայողական ռիսկի կամ անհաղթահարելի ուժի հետևանքով:

Զինծառայողները ծառայողական պարտականությունները կատարելիս անզգուշաբար հասցված վնասը հատուցելիս կրում են սահմանափակ նյութական պատասխանատվություն:

Եթե պատճառված վնասը կապված չէ ծառայողական պարտականությունների կատարման հետ, ապա զինծառայողները պատասխանատվություն են կրում օրենքով սահմանված կարգով:

Նյութական վնաս պատճառելու հետ կապված իրավախախտում թույլ տալու դեպքում զինծառայողները հատուցում են վնասն՝ անկախ պատասխանատվության այլ ձևերի ենթարկվելուց կամ հասարակական ներգործության միջոցների գործադրումից:

Իրավական հիմքեր.

1. «Զինծառայողների նյութական պատասխանատվության մասին» ՀՀ օրենքի 3-րդ, 4-րդ հոդվածներ,

2. Հայաստանի Հանրապետության զինված ուժերի ներքին ծառայության կանոնագրքի 28-րդ, 30-րդ կետեր։