Մարտական հերթապահության մեջ ընդգրկվելու արգելք

Շարքային կազմի պարտադիր զինվորական ծառայության ընթացքում մարտական հերթապահության մեջ ընդգրկելու սահմանափակումներ են նախատեսված նաև ընտանեկան պայմանների հիմքով (տես՝ հավելված 7):

Ընտանեկան պայմանների հիմքով մարտական հերթապահության մեջ ներգրավվելու սահմանափակումները, սակայն, չեն գործում, եթե նման իրավունք ունեցող զինծառայողը ցանկություն է հայտնել ընդգրկվելու մարտական հերթապահության մեջ կամ ցանկություն է հայտնել Հայաստանի Հանրապետության պաշտպանության նախարարության կողմից նշված վայրում և պայմաններում անցնել զինվորական ծառայություն և Հայաստանի Հանրապետության պաշտպանության նախարարության հետ կնքել է համապատասխան պայմանագիր:

Մարտական հերթապահության մեջ չի կարող ընդգրկվել և ռազմական գործողություններում չի կարող ներգրավվել նաև այն զինծառայողը, որն առողջական վիճակի վերաբերյալ եզրակացության համաձայն պիտանի է զինվորական ծառայության համար սահմանափակումով, և այդ սահմանափակումներն իրենց բնույթով արգելք են հանդիսանում մարտական հերթապահություն իրականացնելու կամ ռազմական գործողությունների մասնակցելու համար:

Արգելվում է մարտական հերթապահության նշանակել նաև այն զինծառայողներին, որոնց նկատմամբ քրեական գործով վարույթի ընթացքում որպես խափանման միջոց է ընտրվել հրամանատարության հսկողությանը հանձնելը:

Իրավական հիմքեր.

1. «Զինվորական ծառայության և զինծառայողի կարգավիճակի մասին» ՀՀ օրենքի 26-րդ հոդվածի 2-րդ, 3-րդ մասեր,

2. Հայաստանի Հանրապետության զինված ուժերի ներքին ծառայության կանոնագրքի 365-րդ կետ։