Վերադասի հրամանի բողոքարկման կարգը

Անկախ հրամանի օրինական կամ անօրինական լինելուց, ենթական պարտավոր է անվերապահորեն կատարել պետի հրամանները: Հրամանը կատարելուց հետո միայն նա կարող է բողոքել, եթե կարծում է, որ իր նկատմամբ ճիշտ չեն վարվել կամ համաձայն չէ հրամանի հետ:

Ակնհայտ անօրինական հրամանով կամ կարգադրությամբ դիտավորյալ հանցանք կատարած անձը պատասխանատվություն է կրում ընդհանուր հիմունքներով:

Ակնհայտ անօրինական հրամանը կամ կարգադրությունը չկատարելը բացառում է քրեական պատասխանատվությունը:

Զինվորական ծառայության անցման հետ կապված հարցերով, ինչպես նաև իր նկատմամբ կիրառված կարգապահական տույժը բողոքարկելու նպատակով, զինծառայողն իրավունք ունի վերադաս հրամանատարներին զեկուցագիր ներկայացնել: Իր նկատմամբ կիրառված կարգապահական տույժը զինծառայողը կարող է բողոքարկել տույժի մասին իրեն հայտարարվելու օրվանից ոչ ուշ, քան մեկամսյա ժամկետում:

Զեկուցագիր ներկայացրած զինծառայողի նկատմամբ անօրինական կամ անարդար գործողություններ կատարած կամ անգործություն թույլ տված հրամանատարը ենթակա է օրենքով նախատեսված պատասխանատվության:

Արգելվում է զինծառայողի կողմից զեկուցագիր ներկայացնելուն խոչընդոտելը, դրա համար պատժելը, նրա պատիվն ու արժանապատվությունը նսեմացնելը կամ այլ անարդարացի վերաբերմունքի դրսևորումը։ Արգելվում է նաև խոչընդոտելն իր խախտված իրավունքների դատական կարգով պաշտպանությունն ամբողջ ծավալով իրականացմանը:

Զեկուցագրում ներկայացված հարցերի լուծումը մերժելու դեպքում այդ մասին գրավոր հայտնվում է զեկուցագիր ներկայացրած զինծառայողին`   նշելով մերժման պատճառները, մերժման համար հիմք համարվող Հայաստանի Հանրապետության օրենքների և այլ իրավական ակտերի պահանջները, ինչպես նաև պարզաբանելով մերժումը բողոքարկելու կարգը:

Իրավական հիմքեր.

1. Հայաստանի Հանրապետության զինված ուժերի կարգապահական կանոնագրքի 46-րդ, 47-րդ հոդվածներ,

2. Հայաստանի Հանրապետության քրեական օրենսգրքի 47-րդ հոդվածի 2-րդ, 3-րդ կետեր։