Աչքապատվաստ

Աչքապատվաստը կատարում են քնած կամ աճող աչքով: Քնած աչքով աչքապատվաստը կատարում են ամռան երկրորդ կեսին և այդ նպատակի համար օգտագործում են ընթացիկ տարվա հասունացած շիվերը:

 

Աճող աչքով աչքապատվաստը կատարում են գարնանը և օգտագործում են անցյալ տարվա աճած կտրոնները: Պատվաստված աչքն սկսում է աճել պատվաստման տարին: Աչքապատվաստը պատվաստի մյուս ձևերի նկատմամբ ունի մի շարք առավելություններ՝

 

- աչքապատվաստը վայրակների ազնվացման ամենահուսալի ձևն է: Այս դեպքում պատվաստի կպչողականությունը լինում է ավելի բարձր:

- աչքապատվաստի տեխնիկան ավելի հասարակ է և տալիս է բարձր արտադրողականություն:  

 

Աչքապատվաստը կատարում են 4 գործողությամբ՝ 1) վահանիկը աչքի (բողբոջի) հետ հանելը, 2) T-աձև կտրվածք անելը, 3) վահանիկի տեղավորելը կտրվածքի մեջ 4) պատվաստի կապելը: Այս գործողությունները պետք է կատարել արագ և պահպանել մաքրությունը:

 

Պատվաստ կատարողը դանակով կտրոնից վահանաձև հանում է 2.5-3սմ երկարությամբ աչք բնափայտի բարակ շերտի հետ միասին: Հետո վայրակի ստորին մասում T-աձև կտրվածք է անում:

 

Պետք է բարձրանցել կեղևը, վահանիկը տեղավորել վայրակի բացված կտրվածքի մեջ, հետո վայրակի բացված կեղևը երկու ձեռքի բութ մատերով սեղմել դեպի աչքը: Աչքը տեղավորելուց անմիջապես հետո կտրվածքը կապում են այնպես, որ կտրվածքի ամբողջ մակերեսը ծածկված լինի, աչքը՝ ազատ:

 

Աչքապատվաստի կպչողականության մեջ կարևոր է, թե պատվաստի համար կտրոնի որ մասից է վերցված աչքը: Կտրոնի ստորին և վերին աչքերը թույլ են զարգացած լինում: Աչքապատվաստի համար պետք է օգտագործել կտրոնի միջին մասի առողջ և հասունացած աչքերը: