Հայաստան – Լյուքսեմբուրգ՝ 1:1

Խաղի հաշիվը 15-րդ րոպեին բացեց շվեյցարական «Սանկտ Գալեն» ակումբի կիսապաշտպան Մարիո Մուչը՝ առաջ մղելով Լյուքսեմբուրգի հավաքականին: Բաց թողած գոլից հետո Հայաստանի հավաքականն ունեցավ մի քանի գոլային հնարավորություններ, իսկ 43-րդ րոպեին խփեց պատասխան գնդակը: Մարկոս Պիզելիի կատարած փոխանցումից հետո գլխի հարվածով աչքի ընկավ Եկատերինբուրգի «Ուրալի» հարձակվող Էդգար Մանուչարյանը, ով առաջին խաղակեսի միջնամասում 100 տոկսանոց գոլային պահ էր բաց թողել: Առաջին խաղակեսում Հայաստանի հավաքականը նկատելի առավելություն ուներ, սակայն լյուքսեմբուրգցիները պարբերաբար պատասխանում էին վտանգավոր գրոհներով: Թիմերն ընդմիջման գնացին 1:1 հաշվի ժամանակ:

 

Վարդան Մինասյանի թիմը շատ ակտիվ սկսեց երկրորդ խաղակեսը և հաշվի մեջ առաջ անցնելու մի քանի լավ հնարավորություններ ստացավ: Գոլային պահեր ունեցան նաեւ լյուքսեմբուրգցիները, ովքեր չկարողացան օգտվել Հայաստանի հավաքականի պաշտպանների սխալներից: Խաղի մնացած ժամանակահատվածում դարպասի նոր գրավումներ չարձանագրվեցին՝ 1:1:

 

64-րդ րոպեին փոխարինման դուրս եկավ հոլանդական «Էմեն» ակումբի կիսապաշտպան Նորայր Ասլանյանը, ով իր նորումուտը նշեց Հայաստանի հավաքականի կազմում: Մոլդովական «Շերիֆի» պաշտպան Արտյոմ Խաչատուրովը նույնպես իր առաջին հանդիպումը անցկացրելց Հայաստանի հավաքականում: Խաչատուրովը մեկնարկային կազմում էր եւ փոխարինվեց 81-րդ րոպեին՝ իր տեղը զիջելով Հրայր Մկոյանին:

 

Ընկերական հանդիպում, Վալանս

 

Հայաստան – Լյուքսեմբուրգ՝ 1:1

 

Էդգար Մանուչարյան, 43 - Մարիո Մուչ, 15

 

Հայաստան. Ռոման Բերեզովսկի, Հովհաննես Համբարձումյան (Արտակ Եդիգարյան, 46), Կամո Հովհաննիսյան, Արտյոմ Խաչատուրով (Հրայր Մկոյան, 81), Ռոբերտ Արզումանյան (Տարոն Ոսկանյան, 85), Կարեն Մուրադյան (Կառլեն Մկրտչյան, 76), Հենրիխ Մխիթարյան, Մարկոս Պիզելի, Արաս Օզբիլիս, Գեւորգ Ղազարյան (Նորայր Ասլանյան, 64), Էդգար Մանուչարյան (Արթուր Սարկիսով, 71):

 

Աղբյուրը` News.am Sport