«Ես հայ եմ» խորագրով միջոցառում Լճաշենի միջնակարգ դպրոցում

Դպրոցում անցկացվեց «Ես հայ եմ» խորագրով գրական-երաժշտական հերթական ցերեկույթ՝ նվիրված Հայաստանի առաջին Հանրապետության և մայիսյան հերոսամարտերի 100-ամյակին: Դպրոցը շնչում էր հայրենասիրական ոգով, թևածում՝ խրոխտ երգն ու պարը: Միջոցառումն սկսվեց դուդուկի գեղեցիկ հնչյուններով, որը կատարեց Սեպուհ Ներսիսյանը /9-րդ դասարան/: Աշակերտների ազատ ու անկաշկանդ խոսքի միջոցով կերտվում էր ազատ ու անկախ Հայաստանը, այն հայրենիքը, որի զավակներն ունեն ապրելու կամք, հավատ, ազատության ձգտում և սիրով ու նվիրվածությամբ են պաշտպանում երկիր հայրենին, հողը հայոց ու տունն իր նվիրական: «Փոքրիկ երգիչներ» երգչախումբը կատարեց «Սարդարապատ» երգը: Մասնակիցները ծիածանեցին եռագույնի գույները՝ ազատ ու անկախ հայրենիքում ապրելու արժանապատվությամբ: Միջոցառումն ուղեկցվեց տեսասահիկներով: Միջոցառման ավարտին դպրոցի տնօրեն Ա.Մուրադյանն իր խոսքում բարձր գնահատեց միջոցառման կազմակերպիչների նվիրումով աշխատանքը և աշակերտների ակտիվ մասնակցությունը դպրոցում անցկացված բոլոր նախաձեռնություններին՝ նվիրված Հայաստանի առաջին հանրապետության և մայիսյան հերոսամարտերի 100ամյակին: Ծ.Կարապետյան Սովորողների հետ դաստիարակչական աշխատանքների կազմակերպիչ