«Գիտելիքից մինչև հաջողություն». Բագրատ Դաբաղյան

Մեր երկիրը շատ լավ վայր է զանազան հետքրքիր գաղափարներ իրագործելու համար, չէ՞ որ համացանցային այս դարաշրջանում շատերիս հնարավորությունները հավասարված են՝ տալով հնարավորություն ցանկացած հենման կետից շրջելու աշխարհը: «Գիտելիքից մինչև հաջողություն» նախագծի շրջանակում այս անգամ դեպի հաջողություն տանող իր ճանապարհի մասին է պատմում Shadowmatic խաղի համահիմնադիր և ծրագրավորող Բագրատ Դաբաղյանը: «Յուրաքանչյուր գործում շատ կարևոր է ունենալ աջակիցներ ու հուսալի թիմ. առավել կարևոր է սիրել այն, ինչ անում եք, որովհետև աշխարհում ոչինչ չի կարող ստիպել նվիրվել չսիրած աշխատանքին»,-նշում է այս հետաքրքիր խաղի գաղափարի հեղինակը: Օգտագործե՛ք ձեր ժամանակը զանազան նոր գիտելիքներ ստանալու, սովորելու, փորձարկելու ու հասկանալու, ինչն է ձեզ առավել դուր գալիս և հստակ քայլերով գնացե՛ք ձեր երազանքի հետևից: Իսկ «Գիտելիքից մինչև հաջողություն» նախագծի շրջանակում դուք կարող եք ծանոթանալ բազմաթիվ պատմությունների մեր կողքին ապրող իրական մարդկանց իրական հաջողության մասին: Ի դեպ, այս գաղափարն ստեղծվել է բացառապես մեկ նպատակով՝ ցույց տալ Հայաստանի աշակերտներին, որ նրանք կարող են հասնել հաջողության, եթե ունեն կրթություն և գիտեն՝ ինչպես կիրառել իրենց գիտելիքները: Պետք չէ գնալ Հայաստանից հաջողության հասնելու համար. դա հնարավոր է նաև Հայաստանում՝ անկախ բնակավայրից և սոցիալական կարգավիճակից: