ՄԻՋՈՑԱՌՈՒՄ՝ ՍԱՐԴԱՐԱՊԱՏԻՑ ՄԻՆՉԵՎ ԱՐՑԱԽ

2018թ. ապրիլի 7-ին Գյումրու թիվ 5 հիմնական դպրոցի հանդիսությունների դահլիճում անցկացվեց ռազմահայրենասիրական բնույթի միջոցառում՝ <<Սարդարապատից մինչև Արցախ>> խորագրով /կազմակերպիչներ՝ զինղեկ, փ/գ-տ Ա. Մարգարյան և սովորողների հետ ԴԱ կազմակերպիչ Լ. Գևորգյան/: Միջոցառումն հիմնականում բաղկացած էր երկու մասերից: Առաջին մասում տեղի ունեցավ <<Զորամաս>> անվանումով մանրակերտի հանդիսավոր բացումը, որի ստեղծման գործում իրենց ներդրումն են ունեցել դպրոցի տնօրինությունը, մանկավարժական հանրույթը և աշակերտները: Այն իր բնույթով եզակի և աննախադեպ նախաձեռնություն է, որն այսուհետ կլինի ՆԶՊ առարկայի արդյունավետ անցկացմանը նպաստող դիդակտիկ անկյուն և լավագույնս կկրթի ապագա հայ զինվորներին՝ նպաստելով զորամասի վերաբերյալ նրանց ճանաչողական գիտելիքների ձեռքբերմանը: Միջոցառման երկրորդ մասն անդրադարձավ 1918թ. Մայիսյան հերոսամարտերին, դրանց արդյունքում Հայաստանի 1-ին Հանրապետության կազմավորմանը, Արցախյան Ազատամարտին, ՀՀ Զինված ուժերի կազմավորման 26-րդ տարեդարձին և քառօրյա պատերազմին: Հնչեցին ՀՀ Պետական և ՀՀ Զինված ուժերի օրհներգերը, որոնք համեմվեցին երգ ու պարով, ասմունքով, երաժշտական համարներով ու բեմականացումներով: Միջոցառման ավարտին շնորհավորանքի խոսքով հանդես եկան աշակերտների ծնողներ, մանկավարժներ և փոխտնօրենները, որից հետո իր բարեմաղթանքի ու շնորհակալության խոսքով այն եզրափակեց դպրոցի տնօրեն Մարինե Թահմազյանը: