Հենրիխ Մխիթարյանը՝ «Արսենալ»-ի ֆուտբոլիստ

Հայաստանի ազգային հավաքականի 29-ամյա կիսապաշտպան Հենրիխ Մխիթարյանը պաշտոնապես դարձել է Լոնդոնի «Արսենալ»-ի ֆուտբոլիստ: Խաղաշապիկի համարի մասին տեղեկությունները կհրապարակվեն ավելի ուշ: «Երջանիկ եմ, որ վերջապես կարողացանք ավարտել այս գործարքը: Ուրախ եմ լինել այստեղ: Երազանքս կատարվել է, քանի որ միշտ երազել եմ «Արսենալ»-ում խաղալու մասին: Այժմ այստեղ եմ և կօգնեմ ակումբիս պատմություն կերտել»,- ասել է Մխիթարյանը: «Հենրիխը լիարժեք ֆուտբոլիստ է: Նա պահեր է ստեղծում, լավ պաշտպանվում, կարողանում է տարածություններ հաղթահարել և շատ նվիրյալ ֆուտբոլիստ է: Կարող եմ ասել, որ նա այն ֆուտբոլիստն է, ով ունի հնարավոր բոլոր որակները»,-նշել է «Արսենալ»-ի գլխավոր մարզիչ Արսեն Վենգերը: Մխիթարյանը գրառում է կատարել Instagram-ում` հրաժեշտի խոսքով դիմելով իր նախկին ակումբին. «Ի սրտե կցանկանայի շնորհակալություն հայտնել «Մանչեսթեր Յունայթեդ»-ի ֆուտբոլիստներին և աշխատակիցներին և հատկապես ակումբի երկրպագուներին իրենց սիրո և աջակցության համար: Ինձ համար մեծ պատիվ էր լրացնել ձեր հիանալի ակումբի պատմությունը Եվրոպա լիգայում հաղթանակով: Ես այդ պահն ու այդ խաղը միշտ կպահեմ իմ հիշողության մեջ: Չեմ մոռանա նաև «կարիճ հարվածս» Boxing Day-ի խաղում, ինչպես նաև «Whoa Mkhitaryan ...» երգը, որը միշտ լսում էի տրիբունաներից: Կարող եմ դեռ բազում հիշարժան պահեր արձանագրել, որոնք մենք կիսել ենք միասին, և ես վայելել եմ դրանցից յուրաքանչյուրը: Կարիերայիս այս հատվածում ես պարզապես ցանկանում եմ հաճույք ստանալ նրանից, որ դուրս եմ գալիս խաղադաշտ և խաղում եմ ֆուտբոլ: Ի սրտե շնորհակալ եմ բոլորիցդ և հաջողություն եմ մաղթում բոլորիդ: Կյանքը շարունակվում է»,- գրել է Մխիթարյանը: Աղբյուրը՝ Armsport.am