Գեղաշենի դպրոցում վառվեցին տոնածառի լույսերը

Ամանորյա տոնական հանդերձանքի մեջ է ամբողջ դպրոցը: Դասարանները,միջանցքները,դռներն ու պատուհանները ուսուցիչների և աշակերտների մասնակցությամբ ամանորյա զարդարանք են ստացել: Նոր տարին այն բացառիկ տոնն է,երբ բոլոր մարդիկ՝ մեծ թե փոքր, հավատում են հրաշքների, ցանկություններ են հայտնում և սպասում այն կախարդանքին, որն իր մեջ կրում է Ամանորի գիշերը: Հավատալով ամանորի հրաշքին՝ տարվա խորհրդանիշ շնիկը Ձմեռ պապի և Ձյունանուշիկի օգնությամբ վառեցին դպրոցի գլխավոր տոնածառի լույսերը՝ բարեմաղթելով անկատար մնացած երազանքների իրագործում նոր տարում, խաղաղություն ամենուր, անսահման երջանկություն և հավատարմություն ամենքին: Դպրոցի տնօրեն Նաիրա Բաբայանը շնորհավորանքի խոսքեր և մաղթանքներ ուղղեց ներկաներին. -Սիրելի՛ ուսուցիչներ,աշակերտներ ,շնորհավոր բոլորիս,ողջ հայ ժողովրդի Նոր տարին: Գալիք 2018 թվականը մեր երկրին թող բերի խաղաղություն,սահմաններին՝ անվտանգություն և ապահովություն,մեր աշխատասեր ժողովրդին՝ անդուլ աշխատանք և արարման բերկրանք,ընտանիքներին՝ բարեկեցություն, զինվորին բազկի ուժ,մտքին՝ արծվի սլացք,երիտասարդներին ու երեխաներին՝ հզոր ու ապահով հայրենիք,խաղաղ երկինք, սովորելու և կայանալու անխափան ընթացք, նպատակասլացություն, երջանիկ կյանք միայն հայրենի հողի վրա: Հայ մարդը թող միայն տունդարձի ճանապարհ բռնի,բոլոր ճամփաները թող Հայաստան բերեն: