Դպրոցների ուսուցիչների աշխատավարձերը կվերանայվեն

«Հավանաբար ճիշտ կլինի դրույքի համար որոշակի բազային միավոր սահմանել, որի հիման վրա էլ կառուցենք աշխատանքը: Ներկայումս ունենք մի վիճակ, որ նույն ուսուցիչը նույն ժամաքանակի դիմաց, նույն ծանրաբեռնվածության դիմաց մի վայրում մի գումար է ստանում, մեկ այլ վայրում՝ մեկ այլ գումար: Իսկ բազային աշխատավարձ ստանալու դեպքում հնարավոր կլինի ուսուցիչների վիճակը բավականին կարգավորել»,- մանրամասնել է նախարարի պաշտոնակատարը: 

Ներկայումս դպրոցները ֆինանսավորվում են՝ ելնելով աշակերտների թվից և շահում են փաստորեն փոքր՝ 100-ից քիչ աշակերտ ունեցող դպրոցները, քանի որ դրանք ֆինանսավորում են ստանում՝ անկախ աշակերտների թվից, և, բնականաբար, մի քանի հարյուր աշակերտներ ունեցողները: Դպրոցների զգալի հատվածի աշակերտների թիվը, ըստ Լևոն Մկրտչյանի, 100-500-ի տիրույթում է, և այստեղ ֆինանսավորման բանաձևը սկսում է չաշխատել, որովհետև դպրոցները թերֆինանսավորում են ունենում:

«Կստեղծենք կայուն հիմք, որ դրանից քիչ ուսուցիչը չստանա: Ամենամեծ դժգոհությունն այն է, որ նույն աշխատանքը մարդը կատարում է, բայց մի տեղ մեկ այլ գումար է ստանում, մեկ այլ տեղ՝ մեկ ուրիշ: Այնինչ հավասարակշռություն է հարկավոր, բացի այդ՝ մեր եղած գումարներն ավելի ճիշտ կբաշխվեն»,- նշել է Լևոն Մկրտչյանը:

Ըստ  Լևոն Մկրտչյանի՝ ամառվա ամիսներին իրենք կկարգավորեն հարցը. ներկայումս արդեն բանակցում են Ֆինանսների նախարարության հետ աշխատավարձերի տրամադրման օպտիմալ եղանակը գտնելու հարցում:

Աղբյուրը՝ Tert.am