Ամփոփվեց «Գնացք 12» աշխատանքային սեմինարի ևս մեկ եռօրյակ

Գնացքն այս անգամ դեպի դպրոցական կայարաններ էր ուղևորվել Երևանի Ա. Շիրվանզադեի անվան թիվ 21, Երևանի թիվ 136, Կոտայքի մարզի Զառի Ժ.Սարգսյանի անվան, Արմավիրի մարզի Դաշտի և Աբովյանի Վ. Համբարձումյանի անվան թիվ 10 դպրոցները ներկայացնող ուսուցիչների հետ:

 

Դպրոցական 12 տարիները խորհրդանշող աշխատանքային սեմինարի նախորդ օրերի ընթացքում ուսուցիչները մասնագիտական ուղղորդմամբ անդրադարձան աշակերտների տարիքային առանձնահատկություններին, ճգնաժամերին, տարիքային տարբեր փուլերում նրանց զարգացման ֆիզիկական, ճանաչողական, հուզական և սոցիալական ասպեկտներին, ինչպես նաև բացահայտեցին աշխատանքի ընթացքում իրենց օգնող և խանգարող հատկանիշները:

 

Եզրափակիչ հանդիպումը, իհարկե, հագեցած էր անակնկալներով և դրական տրամադրությամբ: Գնացքը մասնակից ուսուցիչներին ուղղորդեց դեպի խառնաշփոթում համագործակցության գործիքներով լի մի կայարան, որտեղ մասնագետի օգնությամբ ուսուցիչներն անդրադարձան ուսուցման ընթացքում ծագած կոնֆլիկտային իրավիճակներին և դրանցից բխող սթրեսները հաղթահարելու համար անհրաժեշտ մեթոդներին:

 

Աշխատանքային սեմինարի շրջանակում ուսուցիչները իրենց աշխատանքային գործիքների սնդուկը հարստացնելուց զատ, ձեռք բերեցին նաև նոր ընկերներ, ինչն արտահայտվեց միմյանց նվիրած բացիկներով և ամենահետաքրքիր ու տարբերվող եղանակներով կազմած բնութագրերով: 

 

Հանդիպման ավարտին մասնակից ուսուցիչները շնորհակալություն հայտնեցին Dasaran կրթական ծրագրին մշակած նորարարական և յուրօրինակ սեմինարի համար՝ ընդգծելով, որ այսուհետ կրթական կենտրոն են այցելելու որպես ընտանիքի անդամ: 

 

«Գնացք 12» արդիական կրթաձևերի եռօրյա աշխատանքային սեմինարին մասնակցած ուսուցիչները, իհարկե, ստացան մասնակցության հավաստագրեր:

 

Շարունակելի…