Քաղցր բարեգործություն

Ջրվեժի միջնակարգ դպրոցը ունի մի շարք գեղեցիկ ավանդույթներ: Դրանցից է խմորեղենի բարեգործական ցուցահանդես- վաճառքը: Միջոցառմանը մեծ պատրաստակամությամբ մասնակցում են դպրոցի բոլոր դասարանները: Այն կազմակերպվում է երեք անգամ՝ տարրական, միջին և ավագ դասարանների մասնակցությամբ: Պատրաստությունները ընթանում են մեծ սիրով և խանդավառությամբ. երեխեներին օգնում են ուսուցիչները և ծնողները՝ հիմնական ծանրությունը և պատասխանատվությունը վերցնելով իրենց վրա: Կարևորն այն է, որ այդ ամենը բոլորն անում են ինքնակամ և մեծ հաճույքով: Երբ աշակերտները, դասարան առ դասարան, ծնողների օգնությոմբ, ձևավորում են իրենց սեղանները, սկսվում է ցուցահանդես-վաճառքը: Տիրում է հաճելի իրարանցում և անսովոր քաղցր մթնոլորտում ( դա միայն պետք է տեսնել...) բոլորը շտապում են գնել խմորեղեններից ամենագեղեցիկը, ամանահամեղը... Բոլոր խմորեղենները վաճառվում են կարճ ժամանակահատվածում մեծաթիվ գնորդների՝ հենց նույն աշակերտների, նրանց ծնողների, ուսուցիչների ակտիվության շնորհիվ: Վաճառքից գոյացած ողջ գումարը տրամադրվում է դպրոցին, և հենց աշակերտներն են ամեն անգամ որոշում, թե ինչպես տնօրինեն այդ գումարը, որ այն օգուտ բերի հարազատ դպրոցին: Այսօր Ջրվեժի միջնակարգ դպրոցում իսկական տոն էր: