«Ջնար» ավանդական երաժշտության անսամբլը նվագում է զինվորների համար

Ծրագրի հիմնական նպատակն էր նպաստել զինվորների շրջանում հայկական ժողովրդական, ռազմահայրենասիրական երգի ու երաժշտության տարածմանը, ազգային երաժշտարվեստի լավագույն նմուշներին հաղորդակցմանը և հայրենասիրական ոգու բարձրացմանը:

«Ջնար» ավանդական երաժշտության անսամբլի համերգային ծրագիրը բաղկացած էր ռազմահայրենասիրական, ֆիդայական, հեղինակային երգերից և հայկական ավանդական պարերգերից։ Համերգների ընթացքում մեկ րոպե լռությամբ և հոտնկայս հարգանքի տուրք է տրվել ապրիլյան պատերազմում զոհված զինվորների հիշատակին։

Խմբի կատարումները ջերմորեն են ընդունվել զինվորների կողմից և ուղեկցվել բարձր ծափահարություններով։ Հատուկ ոգևորությամբ է ընդունվել Բարսեղ Կանաչյանի «Գինի լից» երգը, որի կատարման ընթացքում զինվորները ձայնակցել են երգիչներին: Համերգների ավարտին ելույթ են ունեցել զորամասերիի շնորհալի զինվորներից մի քանիսը, ովքեր անսամբլի նվագակցությամբ հայրենասիրական երգեր են երգել և հայկական ավանդական պարեր պարել:

Աղբյուրը՝ Mincult.am