Սուրբ Սարգսի տոնին ընդառաջ

Փետրվարի 11-ին Սևանի Մեսրոպ Մաշտոցի անվան N1 հիմնական դպրոցում նշվում էր Սուրբ Սարգսի տոնը և Տեարնընդառաջը: Սիրո, ընտանեկան ջերմության ու մեծ հավատի կրակն իր շուրջն էր համախմբել դպրոցի աշակերտներին, ուսուցիչներին, տնօրենությանը, ծնողներին և հյուրերին: Միջոցառմանը մասնակցում էին դպրոցի 5-9-րդ դասարանների աշակերտները: Յուրաքանչյուր դասարան պատրաստվել էր յուրովի: Մի դասարան սեղանը ձևավորել էր ավանդական ճաշատեսակներով, հայկական աղանդերներով, մի դասարանը` երգով, մեկը` պարով: Տոնը դարձել էր հայկական ավանդույթներով համեմված բեմականացում, որտեղ կար և’ <<հարս>>, և’ <<փեսա>>, և’ քավոր /9ա դասարանի աշակերտներ/: Սիմվոլիկ կերպարները ներկայացնում էին Տրնդեզ տոնի արարողակարգը: Հնչում էր զուռնան... Հեռվից լսվում էր ձիու խրխինջը, որը տեղափոխում էր <<նորապսակներին>>: Եկեղեցուց բերված մոմերով վառվեց տեարնընդառաջի կրակը, բռնեցին շուրջպար ու սկսեցին երգել ծիսական երգեր, ժողովրդական խաղիկներ: Տա' Աստված, որ միշտ բակերում թնդան դհոլն ու զուռնան, հնչեն ուրախ ու հաղթական երգեր...