Հոբելյանական միջոցառումներ՝ նվիրված Հրանտ Մաթևոսյանին

Ուշագրավ 2015-02-05

ՀՀ կառավարությունում կայացել է հայ անվանի գրող Հրանտ Մաթևոսյանի ծննդյան 80-ամյակին նվիրված հոբելյանական հանձնաժողովի նիստը, որին ներկա են գտնվել նաև մեծանուն գրողի ընտանիքի անդամները՝ կինը և որդին:

Փետրվարի 12-ին լրանում է Հրանտ Մաթևոսյանի ծննդյան 80-ամյակը, և ՀՀ կառավարությունը պատրաստվում է բարձր մակարդակով նշել անվանի գրողի հոբելյանը:

ՀՀ մշակույթի նախարար Հասմիկ Պողոսյանը ներկայացրել է Հրանտ Մաթևոսյանի 80-ամյակին նվիրված հոբելյանական միջոցառումների ծրագրի նախագիծը:

Ծավալվել է մտքերի փոխանակություն, որի շրջանակում հանձնաժողովի անդամները տարբեր միջոցառումներ կազմակերպելու առաջարկներ են ներկայացրել:

Միջոցառումները կմեկնարկեն փետրվարի 12-ին Կոմիտասի անվան պանթեոն այցելությամբ, Հ. Մաթևոսյանի անվան հիմնական դպրոցի սաների մասնակցությամբ հուշ-ցերեկույթով և կշարունակվեն ողջ տարվա ընթացքում:

Նախատեսվում է նաև մեծանուն գրողի հիշատակին նվիրված միջոցառման անցկացում Օպերայի և բալետի ազգային ակադեմիական թատրոնում, վավերագրական ֆիլմի և արխիվային ֆիլմերի ցուցադրություն և այլն:

Կառավարության ղեկավարը հանձնարարել է մշակույթի նախարարին ամփոփել հնչեցված առաջարկները և միջոցառումների ծրագրի վերջնական տարբերակը ներկայացնել վարչապետին:

Աղբյուրը՝ 168.am

Հոբելյանական միջոցառումներ՝ նվիրված Հրանտ Մաթևոսյանին

Բաց մի թողեք նաև...