Երևանի հեծանվահրապարակը համալրվել է 60 պրոֆեսիոնալ հեծանիվներով

Ապրիլի 3-ին, հերթական շրջայցի շրջանակում, խոստման համաձայն, արդեն ձեռքբերված 60 նոր հեծանիվները քաղաքապետն անձամբ է հանձնել պատանի մարզիկներին:

Կարևորելով մարզադպրոցի դերը մայրաքաղաքի սպորտային կյանքի աշխուժացման հարցում, քաղաքապետ Տարոն Մարգարյանն ընդգծել է, որ քաղաքապետարանը շարունակելու է աջակցել մարզակառույցին. «Համոզված եղեք, որ յուրաքանչյուր տարի քաղաքապետարանն աջակցելու է հեծանվահարապարակին նոր հեծանիվներ ձեռք բերելու հարցում: Մեր նպատակն է զարգացնել ինչպես հեծանվասպորտը, այնպես էլ այն ծառայեցնել, որպես տրանսպորտի միջոց: Մենք նաև փորձելու ենք մայրաքաղաքում ստեղծել հեծանվականգառներ ու հեծանվուղիներ, որպեսզի մայրաքաղաքում հարմարավետ պայմաններ ապահովվեն նաև մեր այն քաղաքացիների համար, ովքեր նախընտրում են քաղաքում շրջել հեծանիվներով: Այս մշակույթը ևս մենք պետք է զարգացնենք Երևանում»,- ընդգծել է քաղաքապետը:

Շնորհակալություն հայտնելով խնդրին արագ լուծում տալու համար` պատասխանատուները նշել են, որ 90-ական թվականներից սկսած հեծանվահրապարակը չէր համալրվել նոր գույքով, ինչը խնդիրներ էր առաջացնում ինչպես մեծ թվով մարզվողներ ընդունելու, այնպես էլ լիարժեք մրցումներ կազմակերպելու համար:

Երեխաների խնդրանքով` քաղաքապետ Տարոն Մարգարյանն անձամբ է փորձարկել նոր հեծանիվների հնարավորությունները:

Աղբյուր՝ www.armenpress.am