Տիգրանակերտյան բացահայտումներ

Հնագիտական աշխատանքներն ընթանում են երեք հիմնական տեղամասերում` Ամրացված թաղամասի հյուսիսային պարսպապատ, Անտիկ առաջին թաղամաս և Վաղքրիստոնեական հրապարակի հյուսիսային բակ:

 

Պեղման տարածքի ներկայիս մակերեսը կազմում է մոտավորապես 500 քառակուսի մետր, միջին խորությունը` 2,5 մետր: 

 

Տիգրանակերտում արդեն իսկ արձանագրվել է առաջին և ամենակարևոր հայտնագործությունը, որը երկրորդ նորաբաց եկեղեցու արևելյան խորանի տակ պեղվող վաղքրիստոնեական դամբարանն է:

 

Այն ունի արևմուտք-արևելք ուղղվածություն, քառակուսաձև դամբանասրահ, թաղակապ ծածկ, հյուսիսային և հարավային պատերի մեջ ներկառուցված են մասունքները տեղադրելու համար նախատեսված հատուկ երկայնական խորշեր:

 

Հուշարձանը, թերևս, Աղցքի արքայական դամբարանի և Ամարասի Գրիգորիսի դամբարանից հետո երրորդ լավ պահպանված կառույցն է:

 

Պեղումների արդյունքները հնարավոր կդարձնեն վավերացնել այսօրինակ կառույցի մի նոր հորինվածք, ինչպես նաև փաստագրել և պատմական հիմքերի վրա դնել 5-րդ դարի երկրորդ կեսի Հայաղվանքի արքա Վաչագան Բարեպաշտի կրոնական բարեփոխումների ընթացքը և մանրամասները:

 

Կարևորելով դամբարանի հայտնաբերումը` ԼՂՀ ԿԱ զբոսաշրջության և պատմական միջավայրի պահպանության վարչությունը քննարկում է նորահայտ հուշարձանի ամրակայման և պահպանման աշխատանքների հնարավորությունը:

 

Աղբյուր` www.panorama.am