ԱԱ-2014. Գերմանիա – Արգենտինա` 1:0. Գերմանիայի հավաքականը` աշխարհի քառակի չեմպիոն

Ռիո դե Ժանեյրոյի «Մարականա» ստադիոնում կայացած հանդիպման հիմնական ժամանակում գոլեր չգրանցվեցին: Թիմերը բավական ակտիվ սկսեցին հանդիպումը և սկզբնամասում անցկացնում էին գրոհներ: Առաջին խաղակեսն անցնում էր հավասար պայքարում, թեև գերմանացիներն ունեին տարածքային առավելություն: Խաղի առաջին ամենաիրական գոլային պահը 20-րդ րոպեին ունեցավ իտալական «Նապոլիի» արգենտինացի հարձակվող Գոնսալո Իգուաինը, ով գերմանացի պաշտպանների սխալի արդյունքում մեն-մենակ դուրս եկավ Մանուել Նոյերի դեմ, սակայն շեղ հարվածեց: Այդ դրվագից քիչ անց Իգուաինը գրավեց Նոյերի պաշտպանած դարպասը, բայց արգենտինացու մոտ արձանագրվեց խաղից դուրս վիճակ: Գերմանացիները մեկնարկային 45 րոպեներին ունեցան մեկ գոլային պահ, բայց խաղակեսի վերջնամասում «Շալկեի» պաշտպան Բենեդիկտ Հյովեդեսի հարվածից հետո գնդակը դիպավ դարպասաձողին:

 

Երկրորդ խաղակեսն ավելի ակտիվ սկսեցին հարավամերիկացիները, ովքեր սկզբնամասում կորցրին ևս մեկ 100 տոկոսանոց գոլային պահ: Հարմար դիրքում հայտնվել էր Լիոնել Մեսին, ում հարվածը շեղ ստացվեց: Արգենտինացիները ոչնչով չէին զիջում խաղի ֆավորիտ համարվող գերմանացիներին, որոնց գնդակի վերահսկումն արդյունավետ չէր ստացվում: Ժամանակն անցնում էր, իսկ վտանգավոր պահերը գրեթե բացակայում էին: Գերմանիայի թիմն ակտիվացավ վերջնամասում, երբ ստեղծեց 2 գոլային պահ, բայց Բենեդիկտ Հյովեդեսը չկարողացավ արագ կողմնորոշվել արգենտինացիների դարպասի մոտ, իսկ Տոնի Կրոսի հարվածը շեղ ստացվեց:

 

0:0, և խաղը տեղափոխվեց լրացուցիչ ժամանակ: Այստեղ թիմերի խաղում նկատվում էր զգուշություն, բայց արգենտինացիներն ունեցան ևս մեկ 100 տոկոսանոց գոլային պահ: Այս անգամ մի քանի մետրից դարպասը չկարողացավ գրավել փոխարինման դուրս եկած Ռոդրիգո Պալասիոն, ինչից հետո գործեց ֆուտբոլի չգրված օրենքը: Փոխարինման դուրս եկած Մարիո Գյոտցեն 113-րդ րոպեին բացեց հաշիվը՝ խփելով գերմանացիների հաղթական գոլը: Վերջնամասն անցավ լարված պայքարում, սակայն դարպասի նոր գրավումներ չարձանագրվեցին:

 

Գերմանիան աշխարհի չեմպիոն դարձել էր նաև 1954-ին, 1974-ին և 1990-ին: Արգենտինացիները նման հաջողության հասել են 2 անգամ՝ 1978-ին ու 1986-ին:

 

ԱԱ-2014, եզրափակիչ

 

Գերմանիա – Արգենտինա՝ 1:0

 

Մարիո Գյոտցե, 113

 

Աղբյուրը՝ sport.news.am