ԱԱ-2014. Բրազիլիա - Գերմանիա՝ 1:7

Բրազիլիայի հավաքականը 6 գոլի տարբերությամբ պարտվել էր նաև 1920թ.-ին, երբ Ամերիկայի Գավաթում 6 անպատասխան գոլ էր բաց թողել Ուրուգվայի թիմից:

 

Բունդեսթիմը չափազանց վստահ անցկացրեց առաջին խաղակեսը, և խփելով 5 անպատասխան գոլ, հանեց հաղթողի վերաբերյալ բոլոր հարցերը: Բրազիլացիները շատ ակտիվ սկսեցին խաղը, սակայն Գերմանիայի հավաքականն աստիճանաբար տիրեց նախաձեռնությանը, իսկ 11-րդ րոպեին բացեց հաշիվը: Աչքի ընկավ Մյունխենի «Բավարիայի» կիսապաշտպան Թոմաս Մյուլերը, ում գոլից հետո եղավ Բրազիլիայի հավաքականի համար ճակատագրական ժամանակահատված, երբ գերմանացիները 6 րոպեում խփեցին 4 գոլ: Յոահիմ Լյովի թիմը առավելությունը 23-րդ րոպեին կրկնապատկեց Հռոմի «Լացիոյի» 36-ամյա հարձակվող Միրոսլավ Կլոզեն, ով 16 գոլով դարձավ «Մունդիալների» պատմության լավագույն ռմբարկուն: 36-ամյա գերմանացու գոլին հաջորդեց «Բավարիայի» կիսապաշտպան Տոնի Կրոսի դուբլն ու Մադրիդի «Ռեալի» խաղացող Սամի Խեդիրայի խփած գոլը: Բրազիլացիները մինչև ընդմիջում չէին կարողանում ուշքի գալ և վտանգավոր պահեր չստեղծեցին առաջին խաղակեսում:

 

Երկրորդ խաղակեսը սկսվեց Բրազիլիայի թիմի գրոհների ներքո: Դաշտի տերերը մեկը մյուսի հետևից ստեղծում էին իրական գոլային պահեր, սակայն «Բավարիայի» դարպասապահ Մանուել Նոյերը մի քանի անգամ փրկեց գերմանացիներին: Բրազիլացիների գրոհներն աստիճանբար կորցրին իրենց թափը, իսկ գերմանացիները սկսեցին անցկացնել վտանգավոր հակագրոհներ և խփեցին ևս 2 գոլ: Եվրոպացիներից դուբլի հեղինակ դարձավ փոխարինման դուրս եկած Անդրե Շյուրլեն, ում գոլերին բրազիլացիներն ավելացված ժամանակում պատասխանեցին Լոնդոնի «Չելսիի» կիսապաշտպան Օսկարի դիպուկ հարվածով:

 

Աշխարհի եռակի չեմպիոն Գերմանիայի հավաքականը 8-րդ անգամ նվաճեց աշխարհի առաջնության եզրափակիչի ուղեգիր: Մյուս կիսաեզրափակիչում հուլիսի 9-ին կմրցեն Հոլանդիայի և Արգենտինայի հավաքականները: Այդ զույգի պարտվողը երրորդ տեղի համար խաղում կհանդիպի բրազիլացիներին:

 

ԱԱ-2014, կիսաեզրափակիչ

 

Բրազիլիա – Գերմանիա՝ 1:7

 

Աղբյուրը՝ sport.news.am