ԱԱ-2014. Գերմանիայի և Ֆրանսիայի հավաքականները կիսաեզրափակչում են

Առաջին խաղակեսը զգալի առավելությամբ անցկացրած գերմանացիները հաշիվը բացեցին Դորտմունդի «Բորուսիայի» պաշտպան Մատս Հումելսի գոլի շնորհիվ: 13-րդ րոպեին Տոնի Կրոսն իրացրեց տուգանային հարվածը և Հումելսը հաղթող դուրս եկավ տուգանային հրապարակում ֆրանսիացիների պաշտպան Վարանի հետ պայքարում և գլխի հարվածով գրավեց Լյորիսի պաշտպանած դարպասը:

 

Ընդմիջումից հետո ընթացավ հավասար պայքար: 71-րդ և 73-րդ րոպեներին Ֆրանսիայի հավաքականի կազմում փոփոխության դուրս եկան Լորան Կոսելնին և Լոիկ Ռեմին՝ զգալիորեն թարմացնելով Դիդյե Դեշամի թիմի խաղը: Ֆրանսիան փորձեց պաշարել մրցակցի տուգանային հրապարակը, սակայն Բենզեմայի հարվածից հետո Հումելսը փակեց գնդակը, իսկ Մատյուիդի փորձը կանխեց Նոյերը:

 

Քիչ անց տեղի ունեցավ Բրազիլիա - Կոլումբիա հանդիպումը և Բրազիլիայի հավաքականը նվաճեց Ֆուտբոլի աշխարհի առաջնության կիսաեզրափակիչի ուղեգիրը՝ 2:1 հաշվով առավելության հասնելով Կոլումբիայի թիմի նկատմամբ: Քառորդ եզրափակիչի երկրորդ խաղում Բրազիլիան Ֆորտալեզայում ոչ առանց դժվարությունների կարողացավ պայքարից դուրս թողնել հարևան երկրի ֆուտբոլիստներին:

 

7-րդ րոպեին անկյունայինի խաղարկումից հետո Տիագո Սիլվան բացեց հանդիպման հաշիվը: Երկու գոլային հնարավորություն ուներ Հալկը, սակայն հուսալի խաղաց Կոլումբիայի հավաքականի դարպասապահ Դավիդ Օսպինան:

 

69-րդ րոպեին տուգանային հարվածը փայլուն իրացրեց ՊՍԺ տեղափոխված Դավիդ Լուիսը, որը ոչ մի շանս չտվեց Օսպինային՝ հաշիվը դարձնելով 2:0:

 

80-րդ րոպեին իսպանացի մրցավար Կարլոս Վելասկո Կարբալյոն 11 մետրանոց նշանակեց Բրազիլիայի դարպասին Ժուլիո Սեզարի խախտման համար: Աշխարհի առաջնության ռմբարկուների ցուցակը գլխավորող Խամես Ռոդրիգեսը խփեց իր 6-րդ գնդակը: Մնացած ժամանակում Կոլումբիան չկարողացավ հավասարեցնել հաշիվը:

 

Եզրափակիչի ուղեգրի համար Բրազիլիայի հավաքականը հուլիսի 8-ին կմրցի գերմանացիների հետ:

 

ԱԱ-2014. Քառորդ եզրափակիչ

 

Ֆրանսիա - Գերմանիա՝ 0:1

Բրազիլիա - Կոլումբիա՝ 2:1

 

Աղբյուրը՝ sport.news.am