Գործնական աշխատանք - դիտարկում Երևանի թիվ 141 հիմնական դպրոցում

Տեխնոլոգիա առարկայից դասի թեմաներն էին «Ցանք», «Ցանքի խնամքը», «Ջրի, ջերմության, լույսի դերը բույսի աճեցման ժամանակ», «Աճեցնել լոբի»: «Ես և շրջակա աշխարհը» առարկայից` «Ինչպիսին են բույսերը», «Բույսերի տեսակները՝ վայրի, սենյակային, մշակովի»:

 

Գործնական աշխատանքն սկսվեց դեպի մոտակա դպրոցական այգի կատարած էքսկուրսիայով: Աշակերտները կատարեցին դիտարկումներ: Դիտարկման արդյունքում նրանք պարզաբանեցին, որ բնության մեջ կան տարատեսակ բույսեր` ծառեր, թփեր, խոտաբույսեր: Նկատեցին, որ դրանք իրարից բավականին տարբերվում են: Ծառերն ունեն հաստ բուն, բարձր հասակ: Թփերը ծառերի համեմատ ավելի ցածր են, ունեն մի քանի բարակ, փայտացած բներ: Խոտաբույսի ցողունը բարակ է, փափուկ:

 

Աշակերտները դիտարկեցին նաև ծառերի բողբոջները: Դասարան վերադառնալիս նրանք պատրաստվեցին մշակովի բույսի՝ լոբու ցանքին: Աշակերտներն ունեին համապատասխան ամաններ, հող, լոբու սերմեր, ջուր: Սկզբում փխրեցրին հողը, ցանեցին 2-4 հատիկ սերմ: Ծածկեցին հողով և ջրեցին: Ապա որոշեցին սերմերով ամանների տեղը դասարանում՝ հաշվի առնելով լույսի, ջերմության նկատմամբ բույսի ունեցած պահանջները: 2 աման դրվեց առավել մութ անկյունում: 

 

2 օր հետ աշակերտները կատարեցին առաջին դիտարկումը. հողը չորացել էր, և նրանք թեթևակի ջրեցին այն: Հաջորդ դիտարկման ժամանակ նրանք գրանցեցին, որ հողի մակերևույթը ճաքել է, և երևում են առաջին ծիլերը: Արևոտ պայմաններում աճող ծիլերը առավել շուտ ձևավորվեցին և զարգացան: Իսկ մութ անկյունում ծիլերը շատ դանդաղ ծլեցին և լավ չզարգացան:

 

10 օրից, երբ լոբու մատղաշ շիվերը ձևավորվել էին, աշակերտները ջրեցին հողը և մեկ շիվ հանեցին հողից: Ակնառու երևում էին ձևավորված արմատը, զարգացող ցողունը, փոքրիկ ճյուղերը, տերևները: Բացատրվեց, որ լոբին մշակովի բույս է և սենյակային պայմաններում այլևս չի կարող նորմալ զարգանալ: Լոբու աճի համար անհրաժեշտ են այլ պայմաններ: 

 

Գործնական աշխատանք –դիտարկումը տևեց 19 օր: Աշակերտները կատարեցին եզրահանգումներ, իրենց դիտարկումների արդյունքները  գրանցեցին համապատասխան դիտարկման թերթիկների վրա:

 

Գործնական աշխատանքի գործընթացը ծառայեց իր նպատակին. աշակերտները յուրացրել էին թեմաները: