Չեմպիոնների լիգա. «Աթլետիկո» - «Բարսելոնա»՝ 1:0

Այսպիսով կատալոնական «Բարսելոնան» չկարողացավ հաղթահարել ֆուտբոլի Չեմպիոնների լիգայի քառորդ եզրափակիչի արգելքը՝ 2 խաղերի արդյունքում ճանապարհը զիջելով Մադրիդի «Աթլետիկոյին»:

 

«Աթլետիկոն» չափազանց ակտիվ սկսեց խաղը, ինչին կատալոնացիները պատրաստ չէին և 5-րդ րոպեին բաց թողեցին գոլ: Իսպանիայի հավաքականի կիսապաշտպան Կոկեի խփած գոլից հետո Դիեգո Սիմեոնեի թիմն ունեցավ եւս մի քանի գոլային պահեր, բայց գնդակը 2 անգամ դիպավ «Բարսելոնայի» դարպասաձողին: Մադրիդցիների խելահեղ ճնշումը գնալով նվազում էր, սակայն կատալոնացիներն իրական գոլային պահեր չունեցան առաջին խաղակեսում: 2 անգամ հարվածային դիրքում հայտնվեց Լիոնել Մեսին, ով 2 դեպքում էլ վրիպեց:

 

Երկրորդ խաղակեսն անվելի ակտիվ սկսեց «Բարսելոնան», որը մեկնարկում ունեցավ 2 գոլային պահ: Բրազիլացի Նեյմարին չհաջողվեց հավասարեցնել հաշիվը, թեև հայտնվել էր լավ դիրքում: Ժամանակն անցնում էր, իսկ հյուրերը չէին կարողանում լուրջ ինչ-որ բան առաջարկել մադրիդցիների ամուր ու գրագետ պաշտպանությանը: «Աթլետիկոյի» հակագրոհներն աստիճանաբար դառնում էին ավելի վտանգավոր, սակայն խաղի հաշվի մեջ փոփոխություններ տեղի չունեցան: 1:0 առաջին խաղակեսից հետո, 1:0 մրցավարի եզրափակիչ սուլիչից հետո:

 

Նախորդ անգամ «Աթլետիկոն» Չեմպիոնների լիգայի կիսաեզրափակիչ դուրս եկել էր 40 տարի առաջ՝ 1973-1974 մրցաշրջանում:

 

Կիսաեզրափակիչի զույգերը հայտնի կդառնան վիճակահանության արդյունքում:

 

Չեմպիոնների լիգա, 1/4 եզրափակիչ, պատասխան խաղ

 

«Աթլետիկո» (Իսպանիա) - «Բարսելոնա» (Իսպանիա)՝ 1:0 (առաջին խաղ` 1:1)

 

Կոկե, 5

 

Աղբյուրը՝ sport.news.am