Չեմպիոնների լիգա. «Ռեալ» - «Բորուսիա»՝ 3:0

«Ռեալը» չափազանց ակտիվ սկսեց Մադրիդում կայացած խաղը և արդեն երրորդ րոպեին Գարեթ Բեյլի գոլի շնորհիվ բացեց հաշիվը: Հանդիպման մեկնարկում մադրիդցիների ճնշումն այնքան մեծ էր, որ «Բորուսիան» մոտ 20 րոպե չէր կարողանում ուշքի գալ: 27-րդ րոպեին իսպանացի Իսկոն կրկնապատկեց մադրիդցիների առավելությունը:

 

Ընդմիջումից հետո առանց Ռոբերտ Լևանդովսկու խաղացող դորտմունդցիները կերպարանափոխվեցին և երկրորդ խաղակեսի սկզբնամասում կարող էին կրճատել հաշվի տարբերությունը, սակայն բաց թողեցին իրական գոլային պահ, իսկ այդ գրոհը եզրափակվեց Մխիթարյանի շեղ հարվածով:

 

Քիչ անց հյուրերի պաշտպանների սխալի հետեւանքով հարվածային դիրքում հայտնվեց «Ռեալի» առաջատար Կրիշտիանու Ռոնալդուն, ով չներեց Յուրգեն Կլոպի թիմին՝ երրորդ գնդակն ուղարկելով Ռոման Վայդենֆելերի պաշտպանած դարպասը: Այդ գոլից քիչ անց դարձյալ լավ դիրքում հայտնվեց Հենրիխ Մխիթարյանը, ում հաջող հարվածել թույլ չտվեց «Ռեալի» պաշտպան Պեպեի սահանկումը: 

 

64-րդ րոպեին Հենրիխը փոխարինվեց, իսկ խաղի վերջնամասում դարպասի նոր գրավումներ չարձանագրվեցին, թեև 2 թիմերն էլ ունեցան գոլային պահեր:

 

Տեղեկացնենք, որ պատասխան խաղը տեղի կունենա ապրիլի 8-ին Դորտմունդում:

 

Չեմպիոնների լիգա, 1/4 եզրափակիչ, առաջին խաղ

 

«Ռեալ» (Իսպանիա) - «Բորուսիա» (Գերմանիա)՝ 3:0 

 

Գարեթ Բեյլ, 3, Իսկո, 27, Կրիշտիանու Ռոնալդու, 57

 

Աղբյուրը՝ sport.news.am