Ցուցահանդես՝ «Քոչարի արևելուհիները» խորագրով

2013թ. հոկտեմբերի 22-ին Փարիզի ժամանակակից արվեստի թանգարանում. Պոմպիդու կենտրոնում բացվել էր «Modernités Plurielles» («Մոդեռնի բազմազանությունը») ցուցահանդեսը. նոր և ընդլայնված մեկնաբանությամբ ներկայացվել է 1905-1970թթ. համաշխարհային մոդեռն արվեստը: Տարբեր երկրներում ապրած և ստեղծագործած արվեստագետներ ցուցադրվել են իրենց բնորոշ գեղագիտություններով, ինչը հնարավորություն էր տվել ծանոթանալու 1905-1970թթ. կերպարվեստի տարազան արտահայտչաձևերին: Այս ցուցահանդեսում ներառված է եղել նաև Երվանդ Քոչարի «Արևելուհիները» գեղանկարը, որը 1938 թ. ձեռք էր բերվել Փարիզի ժամանակակից արվեստի թանգարանի կողմից:

 

Փարիզյան ցուցադրությունում ընդգրկված են եղել 47 երկրների 1000 արվեստագետներ. այնպիսի մեծություններ, ինչպիսիք են Պիկասսոն, Լեժեն, Միրոն, Կանդինսկին, Պիկաբիան, Մասոնը, Տատլինը, Մալևիչը և ժամանակի այլ հսկաներ: Ներկայացված են եղել գեղանկար, գրաֆիկ, քանդակ ստեղծագործություններ, լուսանկարչական, դիզայնի, ճարտարապետական հորինվածքներ: Ցուցահանդեսին փակ բացմանը ներկա են եղել Ֆրանսիայում ՀՀ դեսպան Վ. Չիտեջյանը, մշակութային հարցերի պատասխանատու Վ. Վահրամյանը, Ե. Քոչարի թանգարանի տնօրինությունը:

 

«Modernités Plurielles» ցուցադրությունում ներկայացված հանրաճանաչ արեստագետների հետ Քոչարը 1923-1936 թթ. Փարիզում մասնակցել է բազմաթիվ ցուցահանդեսների. Քոչարի թանգարանում ներկայացված են դրանց աֆիշները, հրավիրատոմսերը, կատալոգները և Ավանգարդի մեծերի հետ առնչությունների մասին վկայող այլ արժեքավոր փաստաթղթեր:

 

19-րդ դարի սկզբին Եգիպտոսի գրավումը խթանել է օրիենտալիզմի զարգացումը Եվրոպայում, բացահայտվել են Արևելքի նոր գաղտիքներ և առեղծվածներ, որոնցից ամենագայթակղիչը հարեմն էր` դրախտի մասին երազի մարմնացումն աշխարհի վրա… Եվրոպացի արվեստագետներն իդեալականացնում էին այդ անծանոթ և շատ առումներով փակ աշխարհը:

 

Քոչարը նույնպես անդրադարձել է այս թեմային: Հրապուրված արևելուհիների հմայքով՝ նա ստեղծել է կանանց կերպարների սքանչելի շարք: Դրանք այսօր արտասահմանյան մասնավոր հավաքածուներում են:

 

«Քոչարի արևելուհիները» ցուցահանդեսում ներկայացվում են այդ ստեղծագործությունների բարձրարժեք վերատպությունները: Ցուցադրությունն ուղեկցվելու է մեկնաբանող տեքստերով և տեսաֆիլմով:

 

Նշենք նաև, որ այն բաց կլինի մինչև ապրիլի 15-ը:

 

Աղբյուրը՝ panorama.am