Հայաստանի մասնակցությունը ձմեռային Օլիմպիական խաղերում. Լիլեհամերից՝ Սոչի

Ձմեռային առաջին Օլիմպիական խաղերը կայացել են 1924թ.-ին Ֆրանսիայի Շամոնի քաղաքում: Մասնակցել են 16 երկրից 258 մարզիկ: Ընդգրկված է եղել 9 մարզաձև՝ սահնակային սպորտ, քյորլինգ, չմշկավազք, դահուկային երկամարտ, դահուկավազք, դահուկացատկ, զինվորական բազմամարտ, գեղասահք և տափօղակով հոկեյ:

 

Հայաստանն առաջին անգամ ձմեռային Օլիմպիական խաղերին մասնակցելել է 1994թ.-ին: Խաղերն անցկացվել են Նորվեգիայի Լիլեհամեր քաղաքում: Հայաստանը ներկայացել է երկու մարզիկով՝ Ժոզեֆ Ալմասյան և Քենեթ Թոփալյան (բոբսլեյ):

 

Ճապոնիայի Նագանո քաղաքում կայացած ձմեռային Օլիմպիական խաղերին (1998) Հայաստանը ներկայացել է 6 մարզիկով (4 մարզաձեւում). Ալլա Միքայելյան (դահուկավազք),Արսեն Հարությունյան (լեռնադահուկ), Արմեն Ռաֆայելյան (դահուկային ֆրիսթայլ), Ալեքսանդր Չեստնիխ (գեղասահք, զուգապար), Մարիա Կրասիլցեւա (գեղասահք, զուգապար), Քսենյա Սմետանենկո (գեղասահք, մենապար):

 

2002թ.-ին Խաղերն անցկացվեցին ԱՄՆ-ի Սոլթ Լեյք Սիթիում: Հայաստանից մասնակցել է 9 մարզիկ, կրկին 4 մարզաձեւում. Արսեն Հարությունյան (լեռնադահուկ),Վանեսա Ռաքեջյան (լեռնադահուկ), Ալեքսանդրու Ջորջոս և Դանիել Ջանջիգյան (բոբսլեյ), Արամ Հաջիյան (դահուկավազք),Մարգարիտա Նիկոլյան (դահուկավազք), Քրիստինե Խաչատրյան (դահուկավազք),Արտյոմ Զնաչկով (գեղասահք, զուգապար), Մարիա Կրասիլցեւա (գեղասահք, զուգապար), Յուլյա Լեբեդեւա (գեղասահք, մենապար):

 

Իտալիայի Թուրին քաղաքում կայացած Խաղերին (2006) Հայաստանը ներկայացրել է 4 մարզիկ՝ 3 մարզաձեւում. Վազգեն Ազրոյան (գեղասահք),Աբրահամ Սարկախյան (լեռնադահուկ), Էդմոնդ Խաչատրյան (լեռնադահուկ), Հովհաննես Սարգսյան (դահուկավազք):

 

2010թ. Վանկուվերի Խաղերին Հայաստանը ներկայացավ կրկին 4 մարզիկով, այս անգամ 2 մարզաձեւում. Արսեն Ներսիսյան (լեռնադահուկ), Անի-Մաթիլդա Սերեբրակյան (լեռնադահուկ), Սերգեյ Միքայելյան (դահուկավազք), Քրիստինե Խաչատրյան (դահուկավազք):

 

Սոչիի ձմեռային 22-րդ Օլիմպիական խաղերում Հայաստանը կներկայացնեն Սերգեյ Միքայելյանը (դահուկավազք), Կատյա Գալստյանը (դահուկավազք), Արթուր Եղոյանը (դահուկավազք) և լեռնադահուկորդ Արման Սերեբրակյանը:

 

Աղբյուրը՝ sport.news.am