Կայացավ շախմատի Հայաստանի առաջնության մրցանակաբաշխությունը

Տղամարդկանց Հայաստանի չեմպիոն դարձավ Տիգրան Քոթանջյանը: Վերջինս Ռոբերտ Հովհաննիսյանին գերազանցեց միայն լրացուցիչ ցուցանիշով և կընդգրկվի Հայաստանի հավաքականում:

 

Տիգրան Քոթանջյանը նշեց, որ առաջին անգամ է դառնում չեմպիոն, բայց երկու անգամ էլ առաջին-երկրորդ տեղը կիսել է: 

 

«Մրցաշարը հենց սկզբից շատ լավ է ստացվել ինձ համար: Որ ասեմ,  թե շատ ավելի ուժեղ էի խաղում, քան նախկինում, այդպես չէ: Որակական առումով լավ անցկացրի մրցումը: Ինչ-որ տեղ էլ բախտս բերեց: Չկա այդպիսի խաղ, որտեղ առանց բախտը բերելու կարելի է հաղթել: Մանավանդ, այսօրվա շախմատում:

 

2009թ.-ին ես հավաքականի հետ մասնակցել եմ աշխարհի առաջնությանը: Օլիմպիադան մեծ պատասխանատվություն է: Երբ խաղում ես Եվրոպայի անհատական առաջնությունում, դու խաղում ես քո համար, իսկ այստեղ լարվածությունը մեծ է, քանի որ քո խաղից կախված է հավաքականի արդյունքը: Այս յոթ ամիսներին ես կպատրաստվեմ: Կմասնակցեմ մի քանի open-ների և Երոպայի առաջնությանը»,- նշել է չեմպիոնը:

 

Կանանց Հայաստանի չեմպիոն հռչակվեց Շուշաննա Սարգսյանը, ով հավասար միավորներ հավաքեց Մարիա Գեւորգյանի և Սիրանույշ Ղուկասյանի հետ:

 

 Աղբյուրը` sport.news.am