Էկրանավորվեց Հ. Թումանյանի «Ծիտը» հեքիաթը

«Երևի գիտեք, որ Հայաստանում այդպիսի ծրագիր կա, որով տարբեր երկրներից արմատներով հայ կամավորներ գալիս են Հայաստան, կատարում տարբեր աշխատանքներ: Ֆրանսիայից եկավ Մայդա Շանդեզ Ավագյանը, ով ցանկություն հայտնեց աշխատել երեխաների հետ Շուշիում: Այնտեղ սովորեցնում էր երեխաներին թղթից տիկնիկներ պատրաստել, տարբեր կիրառական ձեռքի աշխատանք և նկարչություն, նաև ստվերների թատրոն: Այդ ընթացքում Նարեկացի արվեստի միության Շուշիի մասնաճյուղի աշխատակիցների հետ միասին նկարեցին փոքրիկ պատմություն՝ օգտագործելով մանրանկարչությունն ու թղթե կերպարներ: Այն կոչվում է «Գիրք մանկանց»:

 

Այնուհետև զարգացրեցինք այդ մտահղացումը ու որոշեցինք մուլտֆիլմ նկարահանել: Քանի որ այդ տարին Նարեկացի արվեստի միությունում հայտարարել էինք թումանյանական, որոշեցինք հենց նրա հեքիաթներից մեկն էլ վերցնել: Երկար քննարկումներից հետո կանգ առանք «Ծիտը» հեքիաթի վրա: Ես ու Մայդան երկու ամիս աշխատեցինք սցենարի վրա: Այնուհետև Մայդայի օգնությամբ Շուշիի երեխաները պատրաստեցին մուլտհերոսների տիկնիկները, և նկարահանումները նույնպես կատարվեցին Շուշիում՝ մոտ մեկ շաբաթվա ընթացքում»-, ասաց պրոդյուսեր Արևիկ Ավանեսյանը:

 

Հեքիաթասացին մարմնավորել է Կարեն Ջանգիրովը, ծտին՝ հնգամյա Ավետիս Իսկենյանը: Մոնտաժը կատարել է Գայանե Խաչատրյանը, հնչյունային ռեժիսորը Արմեն Եգանյանն է: Երաժշտության հեղինակը Արտո Թունջբոյաջյանն է, ով ամբողջ ընթացքում շատ օգնել է թիմին իր խորհրդներով ու մտքերով: Մուլտֆիլմը վեց-յոթ ամսվա աշխատանք է:

 

Ա. Ավանեսյանն ասաց, որ այժմ աշխատում են մուլտֆիլմի թարգմանության վրա՝ անգլերեն, ռուսերեն ու ֆրանսերեն լեզուներով:

 

«Մուլտֆիլմը շատ է դուր գալիս երեխաներին: Երեխաները սովոր են, որ հեքիաթներում լինում են չար ու բարի հերոսներ, բայց կոնկրետ այս հեքիաթում դժվար է այդ բաժանումն անել. ծիտը չարաճճի է, անշնորհք, բայց միաժամանակ բարի է ու շատ հետաքրքիր: Շատ է մոտ մեր մշակույթին՝ մարդիկ մի լավություն անում են, հետո գնում-գալիս ու հազար անգամ ավելին են ուզում»,- ասաց մուլտֆիլմի պրոդյուսերը:

 

Նա նշեց, որ ցանկանում են մուլտֆիլմը ներկայացնել միջազգային փառատոներում: Ըստ Ա. Ավանեսյանի, ունեն ծրագրեր, նախագծեր, որոնք, ֆինանսավորման դեպքում, առաջիկայում կիրականացնեն:

 

Աղբյուրը` panorama.am