«Տատա Սթիլ». Արոնյանը և Գիրին ոչ-ոքի խաղացին

Ինչպես այս տուրից առաջ, այժմ էլ, Արոնյանը (6 միավոր) մեկ միավորով գերազանցում է Գիրիին (5), որը երկրորդ հորիզոնականում է:

 

«Բարդ խաղ ստացվեց: Պարտիայի ընթացքում եղավ մի պահ, երբ ես այնքան էլ լավ դիրք չունեի: Սակայն դրությունը վերահսկողության տակ էր եւ միանշանակ տանուլ տված չէր: Կկորցնեի դիրքը, եթե թույլ տայի մի քանի սխալ:

 

Լավ է, որ հաջորդ տուրը տեղի է ունենալու Էյնդհովենում: Միշտ հաճելի է ճանապարհորդել: Երբ ես խաղում էի Հոլանդիայի լիգայում, սիրում էի լինել փոքր քաղաքներում»- ասել է Լևոն Արոնյանը:

 

Կուբացի Լենյեր Դոմինգեսը պարտության մատնեց հունգարացի Ռիչարդ Ռապորտին և նույնպես ունի 5 միավոր: Հնդիկ Պենտալա Հարիկրիշնան 8-րդ տուրում պարտության մատնեց ամերիկացի Հիկարու Նակամուրային և ունի 4 միավոր: Նակամուրան վաստակել է 3 միավոր: Մյուս պարտիաները շարունակվում են:

 

Հունվարի 23-ին Էյնդհովենում կայանալիք 9-րդ տուրում Լևոն Արոնյանի մրցակիցը կլինի ռուսաստանցի Սերգեյ Կարյակինը:

 

Աղբյուրը` sport.news.am