Արոնյանը սևերով ոչ-ոքի խաղաց Գելֆանդի հետ

Պարտիան ավարտվեց 41-րդ քայլում: Նախորդ 3 տուրերում 3 անընդմեջ հաղթանակ տարած հայ գրոսմայստերը խաղում էր սևերով:

 

«Կարծում եմ՝ հետաքրքիր և հավասար խաղ էր: Հենց սկզբից ստեղծվեցին շատ հետաքրքիր դիրքեր: Ես ունեի ամբիցիաներ, քանի որ դիրքս ավելի լավն էր: Սակայն, ես չէի կարողանում գտնել ուղիներ՝ բարելավելու իմ դիրքը: Ամեն անգամ, երբ փորձում էի ինչ-որ քայլ ձեռնարկել, մրցակիցն արժանի հակաքայլ էր կատարում: Այդ պատճառով չէի ցանկանում մեծ ռիսկի դիմել: Առավելության հասնելու ճանապարհ չէի տեսնում և որոշեցի համաձայնվել ոչ ոքի արդյունքի»,- Արոնյանի խոսքը մեջբերում է մրցաշարի մամուլի ծառայությունը:

 

Հայաստանի հավաքականի առաջատարն ունի 5.5 միավոր և միանձնյա գլխավորում է մրցաշարային աղյուսակը: 7-րդ տուրի մյուս պարտիաները դեռ չեն ավարտվել: 

 

Հունվարի 20-ը Վեյկ Ան Զեեում հանգստյան օր է: Հունվարի 21-ին կայանալիք 8-րդ տուրում Լևոն Արոնյանը սևերով կմրցի հոլանդացի Անիշ Գիրիի հետ:

 

Աղբյուրը` sport.news.am