Շուշաննա Սարգսյանը և Տիգրան Քոթանջյանը՝ միանձնյա առաջատարներ

Հայուհիների պայքարում առաջին տեղ դուրս եկավ Շուշաննա Սարգսյանը, որը սևերով հաղթեց Սուսաննա Գաբոյանին: Մինչդեռ աղյուսակի վերնամասում գտնվող Աննա Հայրապետյանը և Մարիա Գևորգյանը առերես մրցավեճում կիսեցին միավորը:

 

Ենթաառաջատարների խմբում են նաև Նարինե Գասպարյանը և Արմինե Բաբայանը, որոնք սպիտակներով հաղթեցին համապատասխանաբար Սիրանուշ Ղուկասյանին և Հասմիկ Ղամբարյանին: Տուրի մյուս պարտիայում Սվետլանա Միրզաբեկյանը սևերով գերազանցեց Անահիտ Գևորգյանին:

 

Երեք տուրից հետո մրցաշարային աղյուսակն ունի այսպիսի տեսք. Սարգսյան՝ 3, Մ. Գևորգյան, Հայրապետյան՝ 2,5-ական, Գասպարյան, Բաբայան՝ 2-ական, Միրզաբեկյան, Ղուկասյան, Ա.Գևորգյան՝ 1-ական, Գաբոյան, Ղամբարյան՝ 0-ական միավոր:

 

Տղամարդկանց ստուգատեսի միանձնյա առաջատար դարձավ Տիգրան Քոթանջյանը, որը սևերով պարտության մատնեց Հայաստանի նախկին չեմպիոն Ավետիք Գրիգորյանին: Առաջին եռյակում են նաև Կարեն Գրիգորյանը և երկրի մյուս երբեմնի չեմպիոն Ռոբերտ Հովհաննիսյանը, որոնցից առաջինը առավելության հասավ վանաձորցի, պատանիների աշխարհի նախկին չեմպիոն Սամվել Տեր-Սահակյանի նկատմամբ, իսկ երկրորդը գերազանցեց Զավեն Անդրեասյանին:

 

Մրցաշարում առաջին հաղթանակը տարավ տիտղոսավոր Տիգրան Պետրոսյանը, որը սպիտակներով հաղթեց Լևոն Բաբուջյանին: Իսկ Հրանտ Մելքումյանը և Արման Փաշիկյանը խաղաղ դաշն կնքեցին:

 

4-րդ տուրից առաջ մասնակիցները դասավորվել են հետևյալ հաջորդականությամբ. Քոթանջյան՝ 2,5, Կ. Գրիգորյան, Հովհաննիսյան՝ 2-ական, Բաբուջյան, Մելքումյան, Պետրոսյան՝ 1,5-ական, Փաշիկյան, Տեր-Սահակյան, Անդրիասյան, Ա. Գրիգորյան՝ 1-ական միավոր:

 

Աղբյուրը` sport.news.am