Տեղի ունեցավ ՀԱՕԿ-ի մրցանակաբաշխությունը

Արարողությանը ներկա էին մի շարք բարձրաստիճան պաշտոնյաներ: ՀՀ երկրորդ նախագահ Ռոբերտ Քոչարյանը, ով նույնպես մրցանակ ստացավ Գագիկ Ծառուկյանի կողմից, որպես սպորտի մեծ նվիրյալ: Նույն մրցանակից ՀԱՕԿ նախագահը նախատեսել էր նաև ՀՀ նախագահ Սերժ Սարգսյանի համար: Սերժ Սարգսյանը ներկա չէր արարողությանը:

 

Մարզիկներին պարգևները հանձնեց անձամբ ՀԱՕԿ-ի նախագահը:

 

ՀԱՕԿ շքանշանով պարգևատրվեցին ՀԱՕԿ հիմնադիր նախագահ Ռուբեն Հակոբյանը, սպորտի վարպետ, Դավիթ Սաֆարյանի հայր ու մարզիչ Հովիկ Սաֆարյանը, Հայաստանի ըմբշամարտի ֆեդերացիայի գործադիր տնօրեն Հովհաննես Սողոյանը: ՀԱՕԿ-ի Հրանտ Շահինյան մեդալով պարգևատրվեցին հունահռոմեական ըմբշամարտի աշխարհի նախկին չեմպիոն Վաղինակ Գալստյանը, նախկին ըմբիշ Բազմասեր Առաքելյանը, Երևանի օլիմպիական հերթափոխի պետական մարզական քոլեջի փոխտնօրեն Վարդան Թովմասյանը:

 

ՀԱՕԿ Տրդատ 3-րդ Արշակունի մեդալով պարգևատրվեցին հունահռոմեական ըմբշամարտի օլիմպիական փոխչեմպիոն Ալֆրեդ Տեր-Մկրտչյանը, ազատ ոճի ըմբշամարտի աշխարհի նախկին չեմպիոն Արա Մարգարյանը, հունահռոմեական ըմբշամարտի մարզիչներ Հրանտ Ենոքյանն ու Ռոբերտ Խաչատրյանը:

 

Պարգևների ցանկում ՀԱՕԿ-ի նախաձեռնությամբ ավելացել է նաև Ալբերտ Ազարյանի անվան մեդալը, որով պարգևատրվեցին եռակի օլիմպիական չեմպիոն Ալբերտ Ազարյանի մրցելույթներն ու հաղթանակները լուսաբանած լրագրողներ, ծանրամարտի ԽՍՀՄ սպորտի վարպետ, համամիութենական ուսանողական խաղերի չեմպիոն, միութենական և միջազգային մրցաշարերի հաղթող և մրցանակակիր, մարզական թեմաներով մեկ տասնյակից ավելի գրքերի հեղինակ, հայկական հեռուստատեսության, ռադիոյի և մամուլի վետերան, Միջազգային օլիմպիական կոմիտեի «Ժառանգություն» ծրագրով ֆիլմերի սցենարիստ Հովհաննես Մարտիրոսյանը, հայկական լուսանկարչական դպրոցի հիմնադիրներից, «Ֆոտոլուր» գործակալության գլխավոր խմբագիր Մելիք Բաղդասարյանը, «Սովետսկի սպորտ» թերթի, «Արմենպրես» գործակալության նախկին թղթակից, Խորհրդային Հայաստանի վաստակավոր լրագրող Ալյոշա Խաչատրյանը:

 

Վլադիմիր Ենգիբարյանի անվան մեդալով էլ պարգևատրվեց Գագիկ Ծառուկյանի անձնական մարզիչ Ալեքսանդր Սարգսյանը:

 

Աղբյուրը` sport.news.am