Հայտնի է Հայաստանի 2013թ. լավագույն ֆուտբոլիստի անունը

Դորտմունդի «Բորուսիայի» կիսապաշտպան Հենրիխ Մխիթարյանը երրորդ տարին անընդմեջ ճանաչվեց Հայաստանի լավագույն ֆուտբոլիստ: Այս տարի 24-ամյա Մխիթարյանը շրջանցեց Հայաստանի հավաքականի և Մոսկվայի «Սպարտակի» ֆուտբոլիստներ Յուրա Մովսիսյանին և Արաս Օզբիլիսին: 26-ամյա Մովսիսյանը երկրորդ տարին անընդմեջ գրավեց երկրորդ տեղը, իսկ 23-ամյա Օզբիլիսը եզրափակեց լավագույն եռյակը:

 

Հենրիխ Մխիթարյանը չորրորդ անգամ ճանաչվեց Հայաստանի տարվա լավագույն ֆուտբոլիստ՝ կրկենելով 2009թ.-ի, 2011թ.-ի և 2012թ.-ի հաջողությունը: Նա ստացավ 4 միլիոն դրամ պարգևավճար:

 

Հայաստանի տարվա լավագույն ֆուտբոլիստի քվեարկությանը մասնակցում են ՀՖՖ գործկոմի անդամները, Բարձրագույն խմբի ակումբների նախագահները, գլխավոր մարզիչները, ավագները, Բարձրագույն խմբի հանդիպումները սպասարկած մրցավարները և տեսուչներն ու լրագրողները:

 

Հիշեցնենք, որ 2013թ.-ին Մխիթարյանը Դոնեցկի «Շախտյորից» տեղափոխվեց Դորտմունդի «Բորուսիա»՝ դառնալով Գերմանիայի փոխչեմպիոնի առանցքային խաղացողներից մեկը: Ուկրաինայի նախորդ առաջնությունում Հայաստանի հավաքականի ֆուտբոլիստը «Շախտյորի» կազմում խփել էր 25 գնդակ և, ճանաչվելով առաջնության լավագույն ռմբարկու, սահմանել էր Պրեմյեր լիգայի արդյունավետության ռեկորդ:

 

Աղբյուրը` sport.news.am