Բելառուս- Հայաստան հանդիպում` 2-րդ անգամ

Հայաստանի և Բելառուսի հավաքականներն անհաջող են հանդես գալիս ընտրական մրցաշարում` 5 հանդիպումներում վաստակելով ընդամենը 3-ական միավոր: Հետաքրքիրն այն է, որ 2 հավաքականներն էլ միակ հաղթանակը տոնել են հյուրընկալվելիս ղազախների հետ մրցավեճում: Առաջինը հաջողության հասան հայ ֆուտբոլիստները` օգոստոսի 11-ին Աստանայում հաղթելով 1:0 հաշվով: Իսկ հոկտեմբերի 10-ին Ալմաթիում տանտերերի նկատմամբ հաղթանակ տոնեցին բելառուսները` 2:1: Ի դեպ, այդ խաղից ընդամենը 4 օր անց ղազախները Երևանում ռևանշի հասան Հայաստանի հավաքականի նկատմամբ` 2:1:

 

Հայաստանի և Բելառուսի երիտասարդական հավաքականների առաջին ծանոթությունը տեղի է ունեցել 2002թ. Եվրոպայի երիտասարդական առաջնության ընտրական մրցաշարում: Առաջին հանդիպումը կայացել է 2000թ. հոկտեմբերի 10-ին Բորիսովում: ՀՀ հավաքականն Արմեն Գյուլբուդաղյանցի գլխավորությամբ շատ անհաջող էր մեկնարկել ընտրական 5-րդ խմբում: Առաջին խաղում մեր ֆուտբոլիստներն Օսլոյում 1:5 հաշվով պարտվել էին նորվեգացիներին:

 

Բելառուսների հետ հանդիպումից ընդամենը 4 օր առաջ Հայաստանի հավաքականը Գյումրիում 1:2 հաշվով զիջել էր ուկրաինացիներին:

 

Ի տարբերություն Հայաստանի հավաքականի, բելառուսները հաջող էին մեկնարկել` սեփական հարկի տակ 4:1 հաշվով հաղթելով Ուելսի ընտրանուն: Սակայն 2-րդ խաղում Բելառուսի հավաքականը հյուրընկալվելիս 0:4 հաշվով պարտվել էր լեհերին:

 

Ընտրական 3-րդ հանդիպումն ավելի անհաջող դասավորվեց հայ ֆուտբոլիստների համար, որոնք Բորիսովում 5 անպատասխան գնդակ ընդունեցին սեփական դարպասը: Արդեն 6-րդ րոպեին Դմիտրի Լոշանկովը բացեց հաշիվը: Մինչև ընդմիջման գնալը 2 անգամ Վիտալի Լեդենյովն ու մեկ անգամ Վիտալի Կուտուզովը գրավեցին Նիկոլայ Սարգսյանի պաշտպանած դարպասը: 2-րդ խաղակեսում Վիտալի Բուլիգան խփեց  5-րդ գոլը:

 

Եվրոպայի երիտասարդական առաջնություններում առայժմ ամենամեծ հաջողությանը Բելառուսի հավաքականը հասել է 2011թ.` անցումային խաղերում առավելության հասնելով իտալացիների նկատմամբ (0:2, 3:0):

 

Աղբյուրը` armsport.am