Շախմատի Եվրոպայի թիմային առաջնությունների արդյունքները

Ցավոք, մեր երկու հավաքականներն էլ մնացին առանց մրցանակային տեղերի, թեև ամենալուրջ հավակնորդներն էին և ամենաիրական հնարավորություններն ունեին՝ առնվազն որևէ հարգի մեդալակիր դառնալու:

 

Կայացած 9 տուրերում հայ գրոսմայստերները՝ Արոնյան, Մովսեսյան, Հակոբյան, Սարգսյան, Տիգրան Լ.Պետրոսյան կազմով (գլխ. մարզիչ՝ Ա.Պետրոսյան) տոնել են 5 հաղթանակ՝ ընդդեմ Ավստրիայի, Մոնտենեգրոյի, Սլովենիայի, Հունգարիայի և Ռուսաստանի ընտրանիների, երեք ոչ-ոքի ավարտել Բուլղարիայի, Ֆրանսիայի և Ադրբեջանի հավաքականների հետ, ինչպես նաև պարտվել Ուկրաինային: Արդյունքում, Եվրոպայի չեմպիոն հռչկավեցին ադրբեջանցիները, Ֆրանսիան դարձավ արծաթե, Ռուսաստանը՝ բրոնզե մեդալակիր, իսկ հայկական ընտրանին գրավեց չորրորդ տեղը:

 

Հատկանշական է, որ Հայաստանի հավաքականները Եվրոպայի թիմային առաջնություններին մասնակցում են 1992-ից: Այսպես, Հայաստանի տղամարդկանց հավաքականն իր ամենամեծ հաջողությանը հասել է 1999-ին Բաթումում անցկացված մրցաշարում` հռչակվելով Եվրոպայի չեմպիոն: Մեր թիմում ոսկե մեդալների արժանացան Սմբատ Լպուտյանը, Արտաշես Մինասյանը, Աշոտ Անաստասյանը, Լեւոն Արոնյանը եւ Արշակ Պետրոսյանը: Իսկ մինչ այդ, 1997-ին Խորվաթիայի Պուլա քաղաքում անցկացված մրցաշարում մեր շախմատիստները բրոնզե մրցանակակիր էին դարձել: Թիմի կազմում էին Վլադիմիր Հակոբյանը, Ռաֆայել Վահանյանը, Սմբատ Լպուտյանը, Արտաշես Մինասյանն ու Աշոտ Անաստասյանը: Վերջին հաջողությանը Եվրոպայի առաջնություններում մեր թիմը հասել է 2007-ին Հունաստանի Իրակլիոն քաղաքում անցկացված մրցաշարում դառնալով արծաթե մրցանակակիր: Հաջողությունում իրենց ներդրումն ունեցան Լեւոն Արոնյանը, Վլադիմիր Հակոբյանը, Գաբրիել Սարգսյանը, Կարեն Ասրյանն (այժմ՝ երջանկահիշատակ-խմբ.) ու Սմբատ Լպուտյանը:

 

Հավելենք, որ մի քանի օրից Թուրքիայի Անթալիա քաղաքում մեկնարկելու է նաև աշխարհի առաջնությունը, որին մասնակցելու է Հայաստանի հավաքականը: Մեր ընտրանին, ի դեպ, աշխարհի գործող չեմպիոնն է:

 

Աղբյուրը` armsport.am