Նոր տարին նոր դասասենյակում

Կրթական 2014-12-24

Գաղտնիք չէ, թե որքան մեծ է կրթության դերն ու նշանակությունը և´ պետականության, և´ երիտասարդ սերնդի հոգևոր ու մտավոր ներուժի ամրապնդման հարցում: Գաղտնիք չէ նաև այն, որ կրթության ամուր հիմքը դրվում է հենց դպրոցում: Որքան մեծ է դպրոցում դասավանդող ուսուցիչների նվիրումն ու սերն աշակերտների և մանկավարժական աշխատանքի նկատմամբ, այնքան մեծ է սաների փոխադարձ սերը հարազատ դպրոցի, ուսուցիչների և հետաքրքրությունը կրթության նկատմամբ:

Կրթական գործընթացի արդյունավետությունը, բացի այդ ամենից, պայմանավորում են նաև արտաքին հանգամանքները, ինչպիսիք են դպրոցի, դասասենյակների պատշաճ տեսքն ու հարմարավետությունը:

Այդ գիտակցումով էլ «Dasaran.am» կրթական ծրագիրը, ի թիվս իր բազմաթիվ նախաձեռնությունների՝ այս անգամ իր աջակցությունն էր ցուցաբերել Երևանի «Վարդանանց ասպետներ» թիվ 106 հիմնական դպրոցի դասասենյակներից մեկի վերանորգման հարցում:

Դեկտեմբերի 22-ին տեղի ունեցավ վերանորոգված դասասենյակի բացման հանդիսավոր արարողությունը: Վերջինս ուղեկցվեց աշակերտների և ուսուցչուհու միասնական ուժերով կազմակերպված բեմականացմամբ, որի ընթացքում «Dasaran.am»-ը համեմատվեց կախարդական փայտիկի հետ:

Միջոցառման ավարտին մասնակից աշակերտները «Dasaran»-յան թիմի կողմից պարգևատրվեցին խրախուսական նվերներով և «Dasaran.am»-ի՝ դպրոց-մշակույթ կապի ամրապնդմանն ուղղված ծրագրի շրջանակներում հրավիրվեցին Հայաստանի ազգային պատկերասրահ՝ մասնակիցը դառնալու ինտերակտիվ շրջայցի:

Դպրոցի սաներն էլ իրենց հերթին «Dasaran.am»-ի թիմին նվիրեցին «Բարությունը կփրկի աշխարհը» խորագրով շնորհակալագիր:

Հանդիսության ավարտին «Dasaran»-ցիները դպրոցականներին փոխանցեցին «Dasaran.am» կրթական ծրագրի հիմնադիր նախագահ Սուրեն Ալոյանի ուղերձը՝ «Սիրելի´ աշակերտներ, Ձեր կրթական հաջողությունները «Dasaran.am»-ի լավագույն գնահատականն են: Մենք աշխատում ենք հենց ձեզ համար, հենց ձեր ժպիտների համար»:

Նոր տարին նոր դասասենյակում

Բաց մի թողեք նաև...